ગુજરાતના ચાર જિલ્લાઓમાં દુષ્કાળ જેવી સ્થિતિ વચ્ચે રાજ્ય સરકાર દ્વારા હેક્ટરદીઠ ₹8,500ની આર્થિક સહાય આપવાની જાહેરાત કરવામાં આવી છે, જેને લઈને રાજકારણ અને ખેડૂત આક્ષેપો શરૂ થઈ ગયા છે. ખેડૂત નેતા પાલ આંબલિયાએ સરકારના આ પેકેજને બટકુ રોટલો ફેંકવા જેવું ગણાવીને તીવ્ર નારાજગી વ્યક્ત કરી છે. તેમના મતે આ રકમ ખેડૂતો સાથેની એક પ્રકારની ક્રૂર મજાક સમાન છે અને આટલી ઓછી મદદથી અન્નદાતાની મુશ્કેલીઓનો અંત આવવાનો નથી. તેમણે સરકારને આ આર્થિક સહાયના નિર્ણય પર ગંભીરતાથી પુનર્વિચાર કરવા ભારપૂર્વક અપીલ કરી છે.
સરકારની આ જોગવાઈ મુજબ પાત્ર ખેડૂતોને પ્રતિ હેક્ટર ₹8,500ની આ સહાય માત્ર 2 હેક્ટરની મર્યાદામાં જ મળવાની છે. પાલ આંબલિયાએ સવાલ ઉઠાવ્યો છે કે જ્યારે વરસાદની અછતથી પાક સંપૂર્ણ નિષ્ફળ ગયો હોય અને ખેતીનો તમામ ખર્ચ માથે પડ્યો હોય, ત્યારે આ સહાય ઊંટના મોઢામાં જીરા સમાન છે. તેમણે જૂના દિવસોને યાદ કરતા દાવો કર્યો કે અગાઉની કોંગ્રેસ સરકારમાં દુષ્કાળ વખતે ખેડૂતોને પાક વીમા હેઠળ 150 ટકા સુધીનો લાભ તેમજ SDRF હેઠળ વધારાની મદદ મળતી હતી, જ્યારે વર્તમાન સરકારે પાક વીમા યોજના બંધ કરીને ખેડૂતોની સુરક્ષા છીનવી લીધી છે. દુષ્કાળની માર માત્ર ખેતર પૂરતી સીમિત નથી હોતી, પરંતુ પશુધનનો નિભાવ, પાણીની તંગી અને ગ્રામ્ય રોજગારી પર પણ તેની ગંભીર અસર પડે છે.
આ ગંભીર મુશ્કેલીઓ બાબતે ખેડૂત નેતાએ સરકારને સ્પષ્ટ ચેતવણી આપી દીધી છે કે જો આગામી સમયમાં સહાયની રકમ વધારવા બાબતે યોગ્ય ફેંસલો નહીં લેવાય, તો આગામી 12 નવેમ્બરથી ગાંધી ચિંધ્યા માર્ગે કે ઉગ્ર લડતનું રણશીંગુ ફૂંકવામાં આવશે. આ આંદોલનની ચીમકી બાદ હવે રાજ્ય સરકાર આ મામલે શું નવો નિર્ણય લે છે અને દુષ્કાળગ્રસ્ત ખેડૂતોને કોઈ વધારાની રાહત કે પેકેજ આપે છે કે નહીં, તેના પર સમગ્ર ગુજરાતના ખેડૂતોની મીટ માંડાઈ છે.
