સસેક્સના ડચેસ મેઘન માર્કલ વર્ષ 2027માં ઓસ્ટ્રેલિયા પરત ફરીને લોકપ્રિય શો જુનિયર માર્કેટશેફમાં સ્પેશિયલ ગેસ્ટ અને કો-હોસ્ટ તરીકે જોડાશે. આ દરમિયાન તેમના પિતા થોમસ માર્કલ સામે બાળ યૌન શોષણની સામગ્રી રાખવાના ગંભીર આરોપો સામે આવતા મામલો ગરમાયો છે અને મેઘને પોતાના બાળકોની સુરક્ષા માટે પિતાથી અંતર રાખ્યું હોવાનું સ્પષ્ટ કર્યું છે.
મેઘન માર્કલ ફરી એકવાર ચર્ચામાં આવ્યા છે કારણ કે તેઓ વર્ષ 2027માં ઓસ્ટ્રેલિયામાં શૂટ થનારા જાણીતા ટીવી શો જુનિયર માસ્ટરશેફ ઓસ્ટ્રેલિયામાં કો-હોસ્ટ તરીકે દેખાવાના છે. ઓસ્ટ્રેલિયાના ચેનલ 10ના જણાવ્યા અનુસાર, મેઘન આ શોમાં ફેમસ હોસ્ટ પોહ લિંગ યેવ સાથે નજરે પડશે. આ શોનું પ્રોડક્શન મેલબોર્ન શોગ્રાઉન્ડ ખાતે થશે, જોકે હજુ સુધી શૂટિંગની કોઈ તારીખ નક્કી કરવામાં આવી નથી. આ પહેલા જુલાઈમાં મેઘને એડલ્ટ માસ્ટરશેફ શોમાં પણ હાજરી આપી હતી, જેને દર્શકોનો જબરદસ્ત પ્રતિસાદ મળ્યો હતો અને ચેનલને 2023 પછીનું સૌથી મોટું સંડે ઓડિયન્સ મળ્યું હતું.
આ પ્રોફેશનલ જાહેરાતની સાથે જ મેઘનના પરિવારનો વિવાદ પણ સામે આવ્યો છે, જેમાં તેમના પિતા થોમસ માર્કલ પર ફિલિપાઈન્સમાં તેમના જૂના ઘરમાંથી બાળ યૌન શોષણની તસવીરો મળી હોવાના આક્ષેપો થયા છે. મેઘનના સાવકા ભાઈ થોમસ માર્કલ જુનિયરે તાજેતરમાં જ ત્યાંના ઓથોરિટીઝને આ અંગે જાણ કરી હતી. જોકે, થોમસ માર્કલ સિનિયરે આ તમામ આરોપોને નકારી કાઢતા તેને ખોટા અને બીમાર માનસિકતાવાળા ગણાવ્યા છે અને કહ્યું છે કે 2025માં મેક્સિકો છોડ્યા પછી આ કમ્પ્યુટર્સ તેમની પાસે નહોતા. ફિલિપાઈન્સના સેબુ ખાતે હ્યુમન ટ્રાફિકિંગ અને ચાઇલ્ડ સેક્સ્યુઅલ એક્સપ્લોઈટેશન ટાસ્કફોર્સ આ મામલાની ગંભીરતાથી તપાસ કરી રહી છે.
આ ગંભીર સ્થિતિ વચ્ચે મેઘન માર્કલે એક નિવેદન જારી કરીને જણાવ્યું છે કે તેઓ આ ખુલાસાથી ખૂબ જ દુઃખી છે અને તેમણે ક્યારેય પોતાના 7 વર્ષના પ્રિન્સ આર્ચી અને 5 વર્ષની પ્રિન્સેસ લિલિબેટને તેમના નાના એટલે કે પિતાને મળવા દીધા નહોતા, જેનું માત્ર એક જ કારણ બાળકોની સુરક્ષા હતું. મેઘને સ્પષ્ટ કર્યું કે તેમને વર્ષો પહેલા જ પિતા સામેના કેટલાક પરેશાન કરનારા આરોપો વિશે જાણ થઈ ગઈ હતી અને સત્તાવાળાઓ તેની તપાસ કરી રહ્યા હતા. ઉલ્લેખનીય છે કે, મેઘન અને પ્રિન્સ હેરી તેમના બાળકો સાથે તાજેતરમાં જ કેલિફોર્નિયાથી યુકે શિફ્ટ થયા છે, અને હવે ઓસ્ટ્રેલિયામાં આ નવા પ્રોજેક્ટને લઈને પરિવાર ત્યાં કામચલાઉ શિફ્ટ થશે કે નહીં તે હજુ સ્પષ્ટ થયું નથી.
