અમદાવાદ એરપોર્ટ પર કસ્ટમ્સ વિભાગની AIU ટીમે શારજાહથી આવેલા એક મુસાફરને ઝડપી પાડ્યો છે. તેની ટ્રોલી બેગમાંથી પ્લાસ્ટિક શીટ નીચે છુપાવેલી સોનાની પેસ્ટ મળી આવી હતી, જેમાંથી રૂ. 72.28 લાખની કિંમતનું શુદ્ધ સોનું જપ્ત કરીને કસ્ટમ્સ એક્ટ હેઠળ ધરપકડ કરવામાં આવી છે.
અમદાવાદ એરપોર્ટ પર વિદેશથી આવતા મુસાફરો દ્વારા થતી ગેરકાયદે દાણચોરી સામે કસ્ટમ્સ વિભાગે લાલ આંખ કરી છે અને તાજેતરમાં એક મોટી સફળતા મેળવી છે. શારજાહથી ફ્લાઇટમાં અમદાવાદ એરપોર્ટ પર ઉતરેલા એક શંકાસ્પદ મુસાફરની હિલચાલ અને પ્રોફાઇલિંગના આધારે કસ્ટમ્સ વિભાગની એર ઇન્ટેલિજન્સ યુનિટ (AIU) ની ટીમે તેને અટકાવ્યો હતો. એરપોર્ટ પર સતત નજર રાખીને બેઠેલી એજન્સીએ આ મુસાફરની કડક પૂછપરછ અને સામાનની સઘન તપાસ શરૂ કરી ત્યારે અંદરથી ચોંકાવનારી વિગતો બહાર આવી હતી.
તપાસ દરમિયાન મુસાફરની ટ્રોલી બેગની અંદર કાળી રંગની પ્લાસ્ટિક શીટની નીચે બારીકાઈથી સોનાની પેસ્ટ છુપાવવામાં આવી હોવાનું પકડાયું હતું. અધિકારીઓએ આ શંકાસ્પદ પેસ્ટને પોતાના તાબામાં લઈને ઓગાળવાની પ્રક્રિયા કરી હતી, જેમાંથી કુલ 495.04 ગ્રામ 24 કેરેટ શુદ્ધ સોનું બહાર આવ્યું હતું. આ જપ્ત કરાયેલા સોનાની વર્તમાન બજાર કિંમત અંદાજે રૂ. 72,28,574 જેટલી આંકવામાં આવી છે. અધિકારીઓ પણ આ પ્રકારે ચાલાકીથી પેસ્ટના સ્વરૂપમાં સોનું લાવવાની યુક્તિ જોઈને ચોંકી ગયા હતા.
આ મામલે કસ્ટમ્સ વિભાગે તાત્કાલિક કાયદેસરની કાર્યવાહી હાથ ધરીને સંબંધિત મુસાફરની કસ્ટમ્સ એક્ટ હેઠળ ધરપકડ કરી લીધી છે. હાલ અમદાવાદ કસ્ટમ્સ દ્વારા આ કેસની ઊંડાણપૂર્વક તપાસ ચાલી રહી છે કે આ સોનું તેણે ક્યાંથી મેળવ્યું હતું અને આ દાણચોરીના નેટવર્કમાં તેની સાથે અન્ય કોઈ શખ્સ કે મોટી ગેંગ સંડોવાયેલી છે કે નહીં. એરપોર્ટ પર સુરક્ષા એજન્સીઓની આ પ્રકારની સતર્કતાથી ગેરકાયદે ધંધા ચલાવનારાઓમાં ફફડાટ વ્યાપી ગયો છે.
