સૌરાષ્ટ્રની જગપ્રસિદ્ધ કેસર કેરી સામાન્ય રીતે ઉનાળાની શરૂઆતમાં અક્ષય તૃતીયા કે માર્ચ અને એપ્રિલ મહિનામાં બજારમાં જોવા મળતી હોય છે. પરંતુ આ વર્ષે ઓક્ટોબર મહિનામાં જ પોરબંદરની માર્કેટિંગ યાર્ડમાં કેસર કેરીનું આશ્ચર્યજનક આગમન થયું છે. સામાન્ય મોસમ કરતાં પૂરા 6 મહિના વહેલી બજારમાં આવેલી આ કેસર કેરીએ વેપારીઓ અને ખેડૂતોમાં ભારે કૂતૂહલ સર્જ્યું છે. પોરબંદર એગ્રીકલ્ચર પ્રોડ્યુસ માર્કેટ કમિટી ખાતે યોજાયેલી ખાસ હરાજીમાં કેસર કેરીની માત્ર 4 પેટીઓ રૂા. 53,500 ની કિંમતે વેચાઈ હતી, જેને જોવા માટે યાર્ડમાં મોટી સંખ્યામાં લોકો ભેગા થયા હતા.
એપીએમસી યાર્ડના સૂત્રોના જણાવ્યા અનુસાર, બજારમાં આવેલી ચાર પેટીઓમાંથી 3 પેટી રાણાવાવ વિસ્તારમાંથી અને 1 પેટી હનુમાનગઢ ગામના એક બગીચામાંથી આવી હતી. હનુમાનગઢથી આવેલી 10 કિલોની કેસર કેરીની પેટી માટે વેપારીઓ વચ્ચે ભારે સ્પર્ધા થઈ હતી અને અંતે આ એક જ પેટી રૂા. 14,500 માં હરાજીમાં વેચાઈ હતી. સામાન્ય રીતે આંબા પર ડિસેમ્બર અને જાન્યુઆરી મહિનામાં મોર બેસતા હોય છે અને માર્ચ-એપ્રિલ સુધીમાં કેરી પાકતી હોય છે. પરંતુ આ વર્ષે ચોમાસામાં વરસાદની ખેંચ અને ઓક્ટોબરમાં નોંધાયેલું અસાધારણ ઊંચું તાપમાન આ ફેરફારનું મુખ્ય કારણ હોવાનું સામે આવ્યું છે.
સમય કરતાં 6 મહિના પહેલા જ કેરી તૈયાર થઈ જવાની આ અણધારી ઘટનાથી બાગાયત નિષ્ણાતો અને ખેડૂતો ચોંકી ઉઠ્યા છે. વાતાવરણના આ પલટાના કારણે આંબામાં સમય કરતાં ઘણો વહેલો ફાલ આવી ગયો હતો. બદલાતી આબોહવા અને ગ્લોબલ વોર્મિંગની સીધી અસર હવે આપણા પાક ચક્ર પર કેવી રીતે પડી રહી છે, તે અંગે આ ઘટનાએ ખેડૂતો અને કૃષિ નિષ્ણાતો વચ્ચે મોટી ચર્ચા જગાવી છે.
