રાજકોટ શહેરમાં ડ્રગ્સ અને નશાના કારોબાર સામે પોલીસે હવે સકંજો કસવાનું શરૂ કરી દીધું છે. આગામી દીવાળીના તહેવારોને ધ્યાનમાં રાખીને યુવાધન નશાના રવાડે ન ચડે તે માટે પોલીસ દ્વારા 'સે નો ટુ ડ્રગ્સ' અભિયાન અંતર્ગત ખાસ વોચ રાખવામાં આવી રહી છે. આ જ દરમિયાન એસઓજીની ટીમને બાતમી મળી હતી કે રૈયા રોડ પર આવેલા યોગીરાજનગર શેરી નં 04 ના ગીરીરાજ એપાર્ટમેન્ટમાં માદક પદાર્થનો મોટો જથ્થો છુપાવવામાં આવ્યો છે. આ ચોક્કસ બાતમીના આધારે પોલીસે તુરંત જ કાર્યવાહી કરીને ફ્લેટમાં દરોડો પાડ્યો હતો અને સ્થળ પરથી જ ગેરકાયદેસર ડ્રગ્સનો જથ્થો ઝડપી પાડ્યો હતો.
પોલીસે આ દરોડા દરમિયાન ફ્લેટમાં હાજર ૩૭ વર્ષીય પૂજાબેન સાગર ભટ્ટની અટકાયત કરી હતી. ઘરની તલાશી લેતા તેમાંથી 680 ગ્રામ વજનનો હાઈબ્રીડ ગાંજો મળી આવ્યો હતો, જેની બજાર કિંમત અંદાજે 23.80 લાખ રૂપિયા થાય છે. પોલીસે ડ્રગ્સ ઉપરાંત એક મોબાઈલ ફોન અને ડિજિટલ વજન કાંટો પણ કબજે કર્યો હતો, જેથી કુલ મુદામાલ રૂ. 23.91 લાખ સુધી પહોંચ્યો હતો. પ્રાથમિક પૂછતાછમાં ચોંકાવનારી વિગતો બહાર આવી હતી કે આ માદક પદાર્થ તેનો ભાણેજ અને કુખ્યાત પેડલર ગૌતમ વસંત દવે તેને સાચવવા માટે આપી ગયો હતો અને અહીંથી જ નાની પડીકીઓ બનાવીને વેચાણ કરવામાં આવતું હતું.
આ ઘટના બાદ પોલીસ બેડામાં પણ ચકચાર મચી ગઈ છે અને ડ્રગ્સ પેડલર્સનું નેટવર્ક કેટલું ફેલાયેલું છે તેની તપાસ શરૂ થઈ ગઈ છે. પોલીસે પકડાયેલી મહિલા સામે એનડીપીએસ એક્ટ હેઠળ ગુનો નોંધીને મુખ્ય સૂત્રધાર એવા ગૌતમ દવેને પકડી પાડવા માટે ચક્રો ગતિમાન કર્યા છે. શહેરમાં આટલી મોટી માત્રામાં હાઈબ્રીડ ગાંજો પકડાવાથી નશાના વેપારીઓમાં ફફડાટ ફેલાઈ ગયો છે, અને આગામી દિવસોમાં આ રેકેટના અન્ય મોટા ખુલાસા થવાની પણ પૂરી સંભાવના છે.
