હાલમાં સોશિયલ મીડિયા પર એક અનોખી અને દિલને સ્પર્શી જાય તેવી હરીફાઈ ચર્ચામાં છે, જેને હોલીવુડની જાણીતી અભિનેત્રી જેસિકા અલ્બા, પેરિસ હિલ્ટન અને જેન્ના ડેવાન જેવા મોટા સ્ટાર્સનું સમર્થન મળી રહ્યું છે. 2026ની બેબી ઓફ ધ યર કન્ટેસ્ટ બાળકોના ચહેરા પર સ્મિત લાવવા માટે એક મોટું અભિયાન બની ગયું છે. આ સ્પર્ધા માત્ર ફોટો કન્ટેસ્ટ નથી, પરંતુ તેના માધ્યમથી જરૂરિયાતમંદ બાળકો માટે કામ કરતી નોન-પ્રોફિટ સંસ્થા બેબીટુબેબી માટે કરોડો રૂપિયાનું ફંડ એકત્ર કરવામાં આવી રહ્યું છે. આ અનોખા ફંડ રેઝરે યુએસના 50 રાજ્યોમાં બાળકો અને પરિવારોને મદદ કરવાનું મોટું કામ કર્યું છે.
આ અભિયાન પાછળનો મુખ્ય ઉદ્દેશ્ય ડાયપર, ફોર્મ્યુલા મિલ્ક, ખોરાક અને કપડા જેવી પ્રાથમિક જરૂરિયાતો ગરીબ કે મુશ્કેલીમાં મુકાયેલા બાળકો સુધી પહોંચાડવાનો છે. આ સ્પર્ધામાં માતા-પિતા કે વાલીઓ પોતાના બાળકનો ફોટો અને પ્રોફાઈલ સબમિટ કરે છે, જેના પર વોટિંગ થાય છે. ફ્રી વોટિંગ ઉપરાંત ડોનેશન દ્વારા પણ વધારાના વોટ આપી શકાય છે, જેની દેખરેખ ડીટીકેર નામની યુએસ પબ્લિક ચેરિટી દ્વારા રાખવામાં આવે છે. સ્પર્ધાના વિજેતા બાળકને 25,000 ડોલરનું ઈનામ અને નેશનલ એડવર્ટાઇઝિંગ કેમ્પેઈનમાં ચમકવાની શાનદાર તક મળે છે. અગાઉ 2024માં સ્લોએન માયા અને 2025માં લુકા આ ખિતાબ પોતાના નામે કરી ચૂક્યા છે.
આ સંસ્થા છેલ્લા 15 વર્ષોમાં હોમલેસ શેલ્ટર્સ, ફોસ્ટર કેર, હોસ્પિટલ અને સ્કૂલોમાં રહેતા 1 મિલિયનથી વધુ બાળકોને અડધા અબજથી વધુ વસ્તુઓ વિતરિત કરી ચૂકી છે. આ કન્ટેસ્ટનું સંચાલન કરતી કોલોસલ સંસ્થાએ 2022થી અત્યાર સુધીમાં ચેરિટી માટે 243 મિલિયન ડોલરથી વધુ ફંડ એકત્ર કર્યું છે. 2026ની આ કન્ટેસ્ટ માટે રજીસ્ટ્રેશન પ્રક્રિયા શરૂ થઈ ગઈ છે, જેમાં ધ ઓનેસ્ટ કંપની, ગ્રેકો અને શટરફ્લાય જેવી મોટી બ્રાન્ડ્સ પણ જોડાઈ છે. આ પ્રકારના પ્રયાસો સાબિત કરે છે કે નાની ખુશીઓ અને ફોટોગ્રાફ્સ પણ સમાજના કલ્યાણ માટે મોટું પરિવર્તન લાવી શકે છે.
