ગયા અઠવાડિયે જોર્ડનના કરાક શહેરમાં એક ગ્રીક ઓર્થોડોક્સ ચર્ચ પર થયેલા ખતરનાક હુમલાના જવાબમાં જોર્ડનની એરફોર્સ દ્વારા મંગળવારે દક્ષિણ સીરિયામાં સશસ્ત્ર જૂથોને નિશાન બનાવીને એરસ્ટ્રાઈક કરવામાં આવી હતી. સીરિયાની સિવિલ ડિફેન્સ એજન્સીના જણાવ્યા અનુસાર, દક્ષિણ સીરિયાના દારા અને સુવેદા પ્રોવિન્સમાં થયેલા આ હવાઈ હુમલાઓમાં 7 નિર્દોષ નાગરિકોના મોત થયા છે. આ ઘટના બાદ સીરિયા સરકારે જોર્ડન સાથેનું મુખ્ય બોર્ડર ક્રોસિંગ અનિશ્ચિત સમય માટે બંધ કરવાની જાહેરાત કરી દીધી છે અને સમગ્ર મામલે તપાસ શરૂ કરી છે.
આ હુમલામાં દારાના ગ્રામીણ વિસ્તારમાં એક ટેન્ટ પર બોમ્બ પડતા એક જ પરિવારના 3 બાળકો અને 1 મહિલા સહિત 5 સભ્યોના મોત થયા છે, જ્યારે પરિવારના અન્ય 3 લોકો ઘાયલ પણ થયા છે. આ ઉપરાંત અલગ-અલગ હુમલાઓમાં 80 અને 60 વર્ષની ઉંમરના 2 વયોવૃદ્ધ પુરુષોએ પણ જીવ ગુમાવ્યો છે. જોર્ડનની એરફોર્સે દાવો કર્યો છે કે આ ઓપરેશનમાં અનેક શંકાસ્પદ આતંકીઓ માર્યા ગયા છે અને તેમના વાહનોનો નાશ થયો છે. જોકે, સીરિયા સરકારનું કહેવું છે કે જોર્ડન દ્વારા આ કાર્યવાહી અગાઉથી કોઈ પણ પ્રકારની જાણકારી કે સંકલન વગર કરવામાં આવી હતી.
અગાઉ શુક્રવારે જોર્ડનની રાજધાની અમાનથી આશરે 90 કિલોમીટર દક્ષિણમાં આવેલા કરાક શહેરમાં એક અંતિમયાત્રા દરમિયાન ચર્ચ પર અંધાધૂંધ ફાયરિંગ કરવામાં આવ્યું હતું, જેમાં 9 લોકોના મોત થયા હતા અને 25થી વધુ લોકો ઘાયલ થયા હતા. આ કેસમાં સોમવારે પોલીસે એન્કાઉન્ટર બાદ 3 શકમંદોની ધરપકડ કરી હતી. જોર્ડનના કિંગ અબ્દુલ્લા બીજાએ દેશની સુરક્ષા સામે જોખમ ઊભું કરનારા તત્વો સામે સખત કાર્યવાહી કરવાનો આદેશ આપ્યો છે, જેના પગલે મધ્યપૂર્વમાં તણાવ વધુ ઘેરો બન્યો છે.
