રાત્રે ગુરુગ્રામના રસ્તાઓ પર અંધારાને કારણે વધતા અકસ્માતના જોખમને ઘટાડવા અને લોકોને પડતી મુશ્કેલીઓ દૂર કરવા માટે મ્યુનિસિપલ કોર્પોરેશને એક ખાસ પ્લાન તૈયાર કર્યો છે. આ યોજના હેઠળ શહેરના 19 મુખ્ય રસ્તાઓ પર કુલ 2,480 સ્ટ્રીટલાઇટ્સ ઇન્સ્ટોલ કરવામાં આવશે. આ પ્રોજેક્ટના પહેલા ફેઝમાં ફૂટપાથ એટલે કે સાઇડવોક પર 2,050 લાઈટ્સ અને સેન્ટ્રલ વર્જ એટલે કે ડિવાઇડર પર 430 લાઈટ્સ લગાડવામાં આવશે. કોર્પોરેશનના જણાવ્યા અનુસાર, આ પગલાથી રાત્રિના સમયે વાહનચાલકો અને રસ્તા પર ચાલતા લોકો માટે વિઝિબિલિટી ખૂબ જ સારી થઈ જશે, જેથી અકસ્માતનું જોખમ મોટા પ્રમાણમાં ઘટી જશે. મેદાંતા રોડના સાઇડવોક પર લાઈટ લગાડવાનું કામ પહેલેથી જ પૂરું કરી દેવામાં આવ્યું છે.
આ લાઈટિંગ પ્લાનમાં શહેરના ઘણા વ્યસ્ત અને મહત્વના રસ્તાઓને આવરી લેવામાં આવ્યા છે. હુડા સિટી સેન્ટરથી સિગ્નેચર ચોક, ગોલ્ફ કોર્સ એક્સટેન્શન રોડ, બખ્તાવર સિંહ ચોક, મેદાંતા ટ્રાફિક લાઈટ, હીરો હોન્ડા ચોકથી બખ્તાવર ચોક, મેફિલ્ડ ગાર્ડન અને એસપીઆર રોડને જોડતો રસ્તો, પાર્ક હોસ્પિટલથી મેફિલ્ડ ગાર્ડન સુધીનો સોહના રોડ તેમજ ધરમ માર્ગ પર ફૂટપાથ લાઈટ્સ લગાવાશે. આ ઉપરાંત સેક્ટર 45-46, 45-53, 51-52-57, 53-56, 44-52, 51-52, 45-48, ગુરુગ્રામ યુનિવર્સિટી રોડ અને સેક્ટર 51-46ના ડિવાઇડર કે સેન્ટ્રલ વર્જ પર પણ નવી લાઈટ્સ નાખવામાં આવશે.
મ્યુનિસિપલ કોર્પોરેશને નાગરિકો માટે પણ એક અપીલ જારી કરી છે કે જે રસ્તાઓનો સમાવેશ પહેલા ફેઝમાં નથી થયો અને જ્યાં લાઈટની જરૂર છે, તેની માહિતી લોકો આપી શકે છે. નાગરિકો તરફથી મળેલા સૂચનો અને ફીડબેકને ધ્યાનમાં રાખીને બીજા ફેઝમાં આવા રસ્તાઓનો પણ સમાવેશ કરવા પર વિચાર કરવામાં આવશે. આ યોજનાથી માત્ર ટ્રાફિક સેફ્ટી જ નહીં વધે, પરંતુ સ્થાનિક રહીશો અને મુસાફરોની રાત્રિની અવરજવર પણ સલામત અને સરળ બનશે.
