આસો મહિનો ચાલી રહ્યો છે છતાં જામનગરવાસીઓ જાણે ઉનાળા જેવી આકરી ગરમીનો અનુભવ કરી રહ્યા હતા. છેલ્લા ઘણા દિવસોથી તાપમાનનો પારો સતત ૩૬ થી ૩૭ ડિગ્રી આસપાસ અટવાયેલો રહેતો હતો, જેના કારણે બપોરના સમયે ઘરની બહાર નીકળવું પણ મુશ્કેલ બન્યું હતું અને પ્રજાજનો પરસેવે રેબઝેબ થઈ રહ્યા હતા. આ ગરમીથી કંટાળેલા લોકો કોઈ ચમત્કારિક વાતાવરણના પલટાની રાહ જોઈ રહ્યા હતા અને આખરે કુદરતે લોકોની આ ફરિયાદ સાંભળી લીધી હોય તેમ છેલ્લા ચોવીસ કલાકમાં તાપમાનના આ ઊંચા આંકડા પર બ્રેક વાગી ગઈ છે.
હવામાન વિભાગના આંકડા મુજબ છેલ્લા ચોવીસ કલાકમાં જામનગરનું મહત્તમ તાપમાન એકસાથે સડસડાટ 4.5 ડિગ્રી નીચે ઉતરી ગયું છે અને સીધું ૩૨.૫ ડિગ્રી પર આવીને અટક્યું છે. આ સાથે જ લઘુતમ તાપમાન પણ સામાન્ય ઘટીને ૨૨.૨ ડિગ્રી જેટલું નોંધાયું છે. તાપમાનમાં અચાનક આવેલા આ મોટા ઘટાડાને કારણે વાતાવરણમાં ઠંડક પ્રસરી ગઈ છે અને છેલ્લા કેટલાક દિવસોથી સતત પરેશાન કરતી ગરમીમાં પણ જોરદાર ઘટાડો જોવા મળ્યો છે, જેને પગલે નાગરિકોએ હાશકારો અનુભવ્યો છે.
તાપમાનમાં આવેલા આ પલટાની સાથે વાતાવરણમાં ભેજનું પ્રમાણ પણ ૧૩ ટકા ઘટીને ૭૨ ટકા આસપાસ રહ્યું છે, જ્યારે પવનની ગતિ પ્રતિ કલાકની સરેરાશ 5 થી 8 કિલોમીટરની રહેવા પામી છે. સવાર અને સાંજના સમયે ફૂકાતા હળવા ઠંડા પવનોએ લોકોના મૂડને પ્રફુલ્લિત કરી દીધો છે અને આગામી દિવસોમાં પણ વાતાવરણ આ જ પ્રકારે ગુલાબી ઠંડકવાળું રહેવાની આશા જાગી છે.
