દુનિયાભરની નજર હાલમાં ચીનની રાજનીતિ પર કેન્દ્રિત થઈ છે, કારણ કે ચાઈનીઝ કમ્યુનિસ્ટ પાર્ટીની એક અત્યંત મહત્ત્વપૂર્ણ પ્લીનમ બેઠકનો પ્રારંભ થઈ ગયો છે. દર 5 વર્ષે યોજાતી આ બેઠક એટલા માટે ખાસ છે કારણ કે તે પ્રમુખ શી જિનપિંગના ચોથા ટર્મનો રસ્તો સાફ કરવા માટે પાયો નાખી રહી છે. આ બેઠકમાં આગામી વર્ષે યોજાનારી કોંગ્રેસ પહેલાં પાર્ટીના શીર્ષ નેતૃત્વમાં મોટા ફેરફારો અને સમીકરણો પર મ્હોર વાગી શકે છે. બેઠકની શરૂઆતમાં જ પ્રમુખ શી જિનપિંગે એક વિસ્તૃત રિપોર્ટ રજૂ કર્યો હતો, જેમાં પાર્ટીની આંતરિક શિસ્ત અને કડક સેલ્ફ-ગવર્નન્સની આવશ્યકતા પર ભાર મૂકવામાં આવ્યો હતો.
આ મહત્ત્વપૂર્ણ સેશનમાં શી જિનપિંગે અત્યાર સુધીના પોતાના કાર્યકાળની સફળતાઓનો પણ હિસાબ આપ્યો હતો. ખાસ કરીને તેમણે દેશભરમાં ચલાવાયેલા મોટા પાયે એન્ટી-કરપ્શન અભિયાનને પોતાની સૌથી મોટી ઉપલબ્ધિ તરીકે રજૂ કર્યું હતું. ભ્રષ્ટાચાર સામેની આ ઝુંબેશના માધ્યમથી તેમણે પાર્ટી અને સેનામાં પોતાની પકડ વધુ મજબૂત કરી છે, અને આ જ બેઠક નક્કી કરશે કે આગામી સમયમાં ચીનની ડાબેરી રાજનીતિ કઈ દિશામાં આગળ વધશે. દુનિયાભરના રાજકીય નિષ્ણાતો આ બેઠકના દરેક નિવેદન અને નિર્ણય પર બારીકાઈથી નજર રાખી રહ્યા છે, કારણ કે તેની સીધી અસર વૈશ્વિક રાજકારણ અને અર્થવ્યવસ્થા પર પડવાની છે.
ચીન જેવા શક્તિશાળી દેશમાં આ બેઠક માત્ર રાજકીય સત્તા પર કબજો જમાવવાની લડાઈ નથી, પરંતુ તે ભવિષ્યની આર્થિક અને વિદેશનીતિઓની રૂપરેખા પણ તૈયાર કરે છે. શી જિનપિંગની લીડરશિપ હેઠળ ચીન વૈશ્વિક સ્તરે પોતાની તાકાત વધારવા મથામણ કરી રહ્યું છે ત્યારે, ઘરઆંગણે વિરોધના તમામ અવાજો દબાવીને ચોથી વખત સત્તા મેળવવી એ તેમના માટે પ્રતિષ્ઠાનો પ્રશ્ન બની ગયો છે. આગામી દિવસોમાં આ પ્લીનમ બેઠકમાંથી કેવા નિર્ણયો બહાર આવે છે અને ડ્રેગન કઈ નવી રણનીતિ સાથે દુનિયા સામે આવે છે, તે તો આવનાર સમય જ કહેશે, પરંતુ અત્યારે તો બેઇઝિંગની આ બંધ બારણાની બેઠકે વૈશ્વિક રાજકારણમાં ગરમાવો લાવી દીધો છે.
