દિલ્હીવાસીઓ માટે શ્વાસ લેવો ફરી એકવાર મોટો પડકાર બની ગયો છે. હવાની ગુણવત્તા એટલી હદે બગડી ગઈ છે કે સામાન્ય માણસનું જીવવું મુશ્કેલ બન્યું છે. પ્રદૂષણ પાછળનું સૌથી મોટું કારણ રોડ પર જમા થતી ધૂળ અને તેનું યોગ્ય સંચાલન ન થવું તે છે. સરકાર ભલે પ્રદૂષણ હટાવવા મોટા-મોટા દાવા કરતી હોય, પણ જમીની હકીકત કંઈક અલગ જ કહાની કહી રહી છે.
શહેરમાં પ્રદૂષણ નિયંત્રણ માટે એન્ટી સ્મોગ ગન અને મિકેનિકલ સ્વીપર મશીનો કામે લગાડવામાં આવ્યા છે, છતાં પણ અનેક વિસ્તારોમાં રોડ-રસ્તાઓની હાલત અત્યંત દયનીય છે. તૂટેલા ફૂટપાથ અને કાચા રસ્તાઓ પરથી પસાર થતાં વાહનો ઉડતી ધૂળ સીધી હવામાં ભળે છે, જેના કારણે પ્રદૂષણનું સ્તર સતત ઊંચું જ રહે છે. રોડ પર જામેલી આ ધૂળ દિલ્હીના પ્રદૂષણ હોટસ્પોટ્સ પર કાયમી માથાનો દુખાવો બની ગઈ છે.
આ સ્થિતિને વધુ ભયાનક બનાવવામાં શહેરમાં ચાલી રહેલા બાંધકામના કામો પણ ફાળો આપી રહ્યા છે. નિયમ મુજબ કન્સ્ટ્રક્શન સાઈટ્સ પર સામગ્રીને ઢાંકીને રાખવાની હોય છે અને કાટમાળ ગમે ત્યાં ફેંકવા પર પ્રતિબંધ છે, પરંતુ ગ્રાઉન્ડ લેવલ પર આ નિયમોના બેફામ ધજાગરા ઉડી રહ્યા છે. ખુલ્લામાં પડી રહેલી સિમેન્ટ અને રેતી પવન સાથે ઉડીને આકાશમાં છવાઈ જાય છે, અને ગેરકાયદેસર રીતે થતો કચરાનો નિકાલ આગમાં ઘી હોમવાનું કામ કરે છે. જો સમયસર આ મામલે કડક પગલાં નહીં ભરાય, તો આવનારા દિવસોમાં દિલ્હીવાસીઓએ સ્વાસ્થ્યના મોટે પાયે ગંભીર પરિણામો ભોગવવા પડશે.
