આપણે ત્યાં પાળતુ પ્રાણીઓ પ્રત્યે લોકોનો કેવો પ્રેમ હોય છે એ તો જગજાહેર છે, પણ જ્યારે કોઈ અબોલ જીવ પરિવારના સભ્ય જેવો બની જાય અને પછી અચાનક ગાયબ થઈ જાય ત્યારે શું વીતે? પંજાબમાં હાલ કંઈક એવી જ ચર્ચા જોરમાં છે. વાત જાણે એમ છે કે પંજાબનો એક જાણીતો ચેમ્પિયન પાડો, જેનું નામ 'રાજા' છે, તે છેલ્લા 20 દિવસથી રહસ્યમય રીતે લાપત્તા છે. આ પાડાની ખ્યાતિ માત્ર ગામ કે જિલ્લા પૂરતી સીમિત નથી, પણ આખોય પ્રદેશ તેને ઓળખે છે કારણ કે તેની દોડવાની તાકાત જ એવી હતી કે મોટા-મોટા રેસના મેદાનો તે ખેડી નાખતો હતો. અંદાજે 20 વર્ષની ઉંમર ધરાવતા આ રાજા પાડાએ પંજાબની પરંપરાગત રેસ સ્પર્ધાઓમાં ભાગ લઈને 100થી વધુ રેસ જીતી હતી. તેની આ કમાલની દોડના કારણે માલિકને ઇનામમાં ટ્રેક્ટર, કાર અનેક બાઇક્સ મળ્યા હતા.
જ્યારે ઘરની શોભા અને ગૌરવ સમાન આવો લાડીલો પાડો અચાનક જ ગાયબ થઈ જાય, ત્યારે માલિકની હાલત કેવી થાય તેનો અંદાજો લગાવી શકાય. રાજાના માલિક જસ્કરણ સિંહ અત્યારે ભારે ચિંતામાં છે અને પોતાના વ્હાલા પાડાને શોધવા માટે તેઓ આકાશ-પાતાળ એક કરી રહ્યા છે. ક્યાંકથી પણ રાજાની ભાળ મળી જાય તે માટે તેમણે જાહેરાત કરી છે કે જે કોઈ વ્યક્તિ આ ચેમ્પિયન પાડાને શોધીને પાછો લાવશે કે તેની સાચી માહિતી આપશે, તેને તરત 1 લાખ રૂપિયાનું રોકડ ઇનામ આપવામાં આવશે. આ જાહેરાત બાદ આસપાસના વિસ્તારમાં પણ લોકો પોતાના સ્તરે રાજાની શોધખોળ કરી રહ્યા છે અને સોશિયલ મીડિયા પર પણ આ બાબત ચર્ચાનો વિષય બની છે.
આ મામલો માત્ર એક પાડાના ખોવાઈ જવાનો નથી, પણ તેની સાથે ચોરી કે અન્ય કોઈ શંકાસ્પદ રમત હોવાની પણ આશંકા સેવાઈ રહી છે. પ્રાપ્ત વિગતો મુજબ રાજાની સાથે બીજા 2 પ્રાણીઓ પણ ગાયબ થયા હોવાની ચર્ચા છે. આ ગંભીર બાબતને ધ્યાનમાં રાખીને પોલીસ પણ હરકતમાં આવી ગઈ છે અને આ રહસ્યમય લાપત્તા થવા પાછળ શું કારણ છે તેની સઘન તપાસ શરૂ કરી દીધી છે. પોલીસ આસપાસના સીસીટીવી ફુટેજ અને શંકાસ્પદ હિલચાલ પર નજર રાખી રહી છે જેથી આ લોકપ્રિય પાડાને જલ્દીથી શોધીને તેના માલિક સુધી પહોંચાડી શકાય અને ચોરો કે અપહરણકારોનો પર્દાફાશ થઈ શકે.
