ચૂંટણી પંચે લોકશાહીને વધુ મજબૂત કરવા માટે એક મહત્વપૂર્ણ ડગલું માંડ્યું છે. ચૂંટણી પંચના 'નો વોટર ટુ બી લેફ્ટ બિહાઈન્ડ' એટલે કે કોઈ પણ મતદાર પાછળ ન રહેવો જોઈએ તે સૂત્રને સાર્થક કરવા માટે દેશના 17 રાજ્યોમાં એસએસઆરની ખાસ પ્રક્રિયા હાથ ધરવામાં આવી રહી છે. જાન્યુઆરી 1, 2027 ના સંદર્ભ સાથે શરૂ થયેલી આ કવાયતમાં આસામ તેમજ આગામી સમયમાં ચૂંટણી થવાની છે તેવા 5 રાજ્યો પણ સામેલ છે. પંચના આ આદેશથી હવે એ વાત સ્પષ્ટ થઈ ગઈ છે કે જે નવા યુવાનો અથવા અગાઉના મતદારો યાદીમાં નામ નોંધાવવાથી વંચિત રહી ગયા હતા, તેમને જોડવા માટે પૂરતી તક મળશે.
આ આખી પ્રક્રિયાનું ટાઈમટેબલ પણ એ રીતે ગોઠવવામાં આવ્યું છે કે જાન્યુઆરી મહિનાના પહેલા જ અઠવાડિયામાં ફાઇનલ મતદાર યાદી બહાર પાડી દેવામાં આવે. ખાસ કરીને નેશનલ વોટર્સ ડે ની ઉજવણી પહેલા જ આ યાદી જાહેર થવાથી દેશના નવા મતદારોમાં ગજબનો ઉત્સાહ જોવા મળશે. જે રાજ્યોમાં એસઆરની પ્રક્રિયા હજુ પૂરી નથી થઈ, ત્યાં તે પૂર્ણ થતાં જ એસએસઆરની કામગીરી શરૂ કરી દેવામાં આવશે તેવી ખાતરી પણ પંચ દ્વારા આપવામાં આવી છે. લોકપ્રતિનિધિત્વ અધિનિયમની કલમ 21 હેઠળ થતી આ વાર્ષિક સુધારણા પ્રક્રિયાથી સામાન્ય પ્રજાને મોટી રાહત મળશે અને મતદાન યાદી એકદમ ચોખ્ખી અને અપડેટેડ રહેશે.
લોકશાહીમાં મતદાન એ સૌથી મોટી તાકાત છે અને તે માટે દરેક પાત્ર નાગરિકનું નામ યાદીમાં હોવું અનિવાર્ય છે. પંચના આ નવા અભિગમથી માત્ર બાકી રહી ગયેલા મતદારો જ નહીં, પરંતુ ચૂંટણી પ્રત્યે લોકોનો વિશ્વાસ પણ વધુ ગાઢ બનશે. અલગ-અલગ રાજ્યોમાં સમયપત્રક ભલે થોડું આગળ પાછળ હોય, પણ હેતુ એક જ છે કે દેશના ચૂંટણી તંત્રમાં કોઈ પણ પ્રકારની કચાશ ન રહે. હવે જોવાનું એ રહેશે કે આ અભિયાન હેઠળ કેટલા નવા યુવા મતદારો આગળ આવીને પોતાની લોકશાહી ફરજ નિભાવવા માટે નામ નોંધાવે છે.
