અમેરિકાના ફ્લોરિડાથી એક મોટા અને ચોંકાવનારા સમાચાર સામે આવ્યા છે. તાલાહસી શહેરમાં આવેલી FAMU યુનિવર્સિટીના સ્ટેડિયમ પાસે ફૂટબોલ મેચના ઉત્સાહ વચ્ચે અચાનક માહોલ લોહિયાળ બની ગયો હતો. મેચ પૂરી થયા બાદ જ્યારે મોટી સંખ્યામાં લોકો રસ્તા પર હતા, ત્યારે અજાણ્યા શખ્સોએ અંધાધૂંધ ફાયરિંગ શરૂ કરી દીધું હતું. આ અણધારી આફતના કારણે રસ્તા પર દોડધામ મચી ગઈ હતી અને લોકો જીવ બચાવવા માટે અહીંતહીં ભાગવા લાગ્યા હતા.
આ ભયાનક હુમલામાં કુલ 11 લોકોને ગોળી વાગી હોવાની સત્તાવાર પુષ્ટિ કરવામાં આવી છે. ઘટનાની જાણ થતાં જ પોલીસ કાફલો અને એમ્બ્યુલન્સની ટીમો તાત્કાલિક ઘટનાસ્થળે દોડી આવી હતી. તમામ ઈજાગ્રસ્તોને તાત્કાલિક નજીકની હોસ્પિટલ ખસેડવામાં આવ્યા હતા, જ્યાં ડોક્ટરોની ટીમ તેમની સારવારમાં વ્યસ્ત છે. હજુ સુધી હુમલા પાછળનું ચોક્કસ કારણ બહાર આવ્યું નથી, પરંતુ પોલીસ આ મામલાની ગંભીરતાને ધ્યાનમાં રાખીને તમામ એંગલથી તપાસ કરી રહી છે.
ઘટના બાદ પોલીસે આસપાસના વિસ્તારને સીલ કરી દીધો છે અને સીસીટીવી ફૂટેજ તેમજ સોશિયલ મીડિયા પર વાયરલ થઈ રહેલા વિડિયોની મદદથી આરોપીઓની ઓળખ કરવાની કોશિશ ચાલુ છે. પોલીસ અધિકારીઓનું કહેવું છે કે ગુનેગારો ગમે ત્યાં છુપાયેલા હોય, તેમને ટૂંક સમયમાં જ ઝડપી લેવામાં આવશે. આ ખૂની ખેલને કારણે સ્થાનિક રહેવાસીઓમાં ભારે ડર અને રોષનો માહોલ જોવા મળી રહ્યો છે.
