દક્ષિણ ભારતમાં ટીવી સ્ક્રીનથી લઈને રસોડા સુધી પોતાની આગવી ઓળખ બનાવનાર લોકપ્રિય શેફ દામુ હવે આપણી વચ્ચે નથી રહ્યા. તેમના અચાનક થયેલા નિધનના સમાચાર સામે આવતા જ સમગ્ર તમિલનાડુમાં શોકનું મોજુ ફરી વળ્યું છે. સામાન્ય લોકોથી લઈને સેલિબ્રિટીઓ સુધીના સૌકોઈ તેમના જવાથી સ્તબ્ધ છે. ખાસ કરીને ફૂડ વર્લ્ડ માટે આ એક એવી ખોટ છે જે ક્યારેય પૂરી નહીં શકાય, કારણ કે શેફ દામુએ માત્ર વાનગીઓ જ નહોતી બનાવી, પણ કરોડો લોકોના દિલ જીત્યા હતા.
આ દુઃખદ સમાચાર મળતા જ તમિલ સિનેમાના સુપરસ્ટાર અને રાજકારણી વિજયે ઊંડો શોક વ્યક્ત કર્યો હતો. વિજય ઉપરાંત તમિલનાડુના અનેક દિગ્ગજ નેતાઓએ પણ આગળ આવીને શેફ દામુને શ્રદ્ધાંજલિ અર્પણ કરી હતી. નેતાઓ અને કલાકારોએ જણાવ્યું હતું કે શેફ દામુ માત્ર એક કૂક નહોતા, પરંતુ તેઓ તમિલનાડુની પરંપરાગત રસોઈ કળાને વૈશ્વિક સ્તરે લઈ જનાર એક મહાન કલાકાર હતા. ટીવી શોઝ દ્વારા તેઓ ઘર-ઘરમાં જાણીતા બન્યા હતા અને પોતાના હસમુખા સ્વભાવથી સૌના પ્રિય રહ્યા હતા.
સોશિયલ મીડિયા પર પણ છેલ્લા કેટલાક કલાકોથી ચાહકો અને સેલિબ્રિટીઓ શેફ દામુ સાથેની પોતાની યાદો તાજી કરી રહ્યા છે. તેમના દ્વારા બનાવવામાં આવતી પરંપરાગત સાઉથ ઇન્ડિયન વાનગીઓની ખૂબીઓ અને તેમનો મિલનસાર સ્વભાવ લોકોને હંમેશાં યાદ રહેશે. આજે ભલે શેફ દામુ શારીરિક રીતે આપણી વચ્ચે નથી, પણ તેમના દ્વારા પીરસાયેલી યાદો અને સ્વાદ હંમેશાં લોકોના દિલમાં અમર રહેશે.
