મોરબી જિલ્લાના ટંકારા તાલુકામાંથી એક એવા સમાચાર સામે આવ્યા છે જેણે ગામડાઓમાં ચાલતા દારૂના ધંધાની પોલ ખોલી નાખી છે. ટંકારાના જબલપુર ગામે દારૂના ત્રાસથી કંટાળેલા જાગૃત ગ્રામજનોએ હવે જાતે જ કાયદો હાથમાં લીધા વગર સતર્કતા દાખવીને બુટલેગરો સામે મોરચો ખોલી દીધો છે. ગામમાં છેલ્લા કેટલાક સમયથી અસામાજિક પ્રવૃત્તિઓ વધી ગઈ હતી, જેનાથી હેરાન થયેલા લોકોએ એક મહિલાને દેશી દારૂની થેલીઓ સાથે ઝડપી પાડીને મોટું ઉદાહરણ પૂરું પાડ્યું છે.
બનેલી ઘટનાની વિગત એવી છે કે જબલપુર ગામમાં એક મહિલા શંકાસ્પદ હાલતમાં ફરી રહી હતી. ખાસ કરીને આશ્ચર્યની વાત તો એ હતી કે આ મહિલા પોતાની સાથે એક નાના બાળકને લઈને દારૂની થેલીઓનું વેચાણ કરી રહી હતી. ગામના લોકોની નજર આ મહિલા પર પડતાં જ તેમણે જબરી સતર્કતા દાખવી હતી અને તેને ભાગવા દીધા વગર ઝડપી લીધી હતી. આ બનાવની જાણ થતાં જ તાત્કાલિક પોલીસને બોલાવવામાં આવી હતી અને પકડાયેલી મહિલાને પોલીસના હવાલે કરવામાં આવી હતી. ગ્રામજનોની આ હિંમત અને જાગૃતિને કારણે વિસ્તારના અન્ય બુટલેગરોમાં પણ ભારે ડર અને ફફડાટ વ્યાપી ગયો છે.
આ સમગ્ર ઘટના બાદ સ્થાનિક લોકોમાં પોલીસ પ્રશાસન સામે પણ ભારે રોષ અને સવાલો ઉઠી રહ્યા છે. ગ્રામજનોએ આક્ષેપ કર્યો છે કે આજકાલ ગામડાઓમાં પણ દેશી અને વિદેશી દારૂની 'હોમ ડિલિવરી' જેવી ગેરકાયદે પ્રવૃત્તિઓ બેરોકટોક ચાલી રહી છે. હવે મોટો સવાલ એ થઈ રહ્યો છે કે જબલપુર જેવા શાંત ગામમાં જો આ પ્રકારે ખુલ્લેઆમ દારૂ વેચાતો હોય, તો શું આ બુટલેગરોને કોઈના આશીર્વાદ મળી રહ્યા છે? સ્થાનિક પોલીસ આ મામલે ઊંઘતી ઝડપાઈ છે ત્યારે જોવું રહ્યું કે પોલીસ ખરેખર આ બુટલેગરો સામે ક્યારે અને કેવા કડક પગલાં ભરે છે.
