વડોદરા જિલ્લાના સાવલી તાલુકા હેલ્થ કચેરી ખાતે ‘ટીબી મુક્ત ભારત અભિયાન’ અંતર્ગત ‘નેશનલ લોન્ચ ઓફ ટીબી જોશ’ કાર્યક્રમનું વિશેષ જીવંત પ્રસારણ યોજવામાં આવ્યું હતું. વડોદરા જિલ્લા વિકાસ અધિકારીની અધ્યક્ષતામાં આયોજિત આ કાર્યક્રમમાં તાલુકાના અનેક લાભાર્થીઓ તેમજ સ્થાનિક આરોગ્ય કર્મીઓ ઉપસ્થિત રહ્યા હતા. ભારત સરકાર દ્વારા ક્ષય રોગના સંપૂર્ણ નાબૂદીકરણ માટે ચલાવવામાં આવી રહેલા આ રાષ્ટ્રીય મહાઅભિયાનમાં સાવલી આરોગ્ય વિભાગ દ્વારા જનજાગૃતિ અને દર્દી સેવાનો સુંદર સમન્વય સાધવામાં આવ્યો હતો.
તાલુકા બ્લોક હેલ્થ સેન્ટર ખાતે આયોજિત આ મહત્વપૂર્ણ કાર્યક્રમ મુખ્ય જિલ્લા આરોગ્ય અધિકારી ડોક્ટર મીનાક્ષીબેન ચૌહાણના માર્ગદર્શન હેઠળ યોજાયો હતો. આ પ્રસંગે જિલ્લા ક્ષય અધિકારી ડોક્ટર જ્યોતિબેન ગોમ્બર, તબીબી અધિકારી ડોક્ટર સંજય પરીખ, જિલ્લા ગુણવત્તા ખાતરી અધિકારી ડોક્ટર હેમસિંગ રાઠોડ ઉપરાંત સાવલીના તાલુકા વિકાસ અધિકારી તેમજ તાલુકા આરોગ્ય અધિકારી વિશેષ ઉપસ્થિત રહ્યા હતા. ઉપસ્થિત તબીબી નિષ્ણાતો અને અધિકારીઓએ ક્ષય રોગના લક્ષણો, વહેલું નિદાન, નિયમિત સારવાર અને પૌષ્ટિક આહારના મહત્વ અંગે ઉપસ્થિત નાગરિકોને ઊંડાણપૂર્વક માર્ગદર્શન પૂરું પાડ્યું હતું.
કાર્યક્રમ દરમિયાન સામાજિક ઉત્તરદાયિત્વના ભાગરૂપે દીપક ચેરિટેબલ ટ્રસ્ટના સહયોગથી પચીસ જેટલા ટીબીના દર્દીઓને જીવનજરૂરી પોષણ કીટનું વિતરણ કરવામાં આવ્યું હતું. આ ઉપરાંત, રાષ્ટ્રીય ક્ષય નિર્મૂલન કાર્યક્રમ અંતર્ગત વર્ષ ૨૦૩૦ સુધીમાં દેશને ક્ષય મુક્ત કરવાના સંકલ્પ સાથે કાર્યરત ‘પ્રધાનમંત્રી ટીબી મુક્ત ભારત અભિયાન ૨.૦’ હેઠળ પ્રશંસનીય કામગીરી કરનાર ટીબી મુક્ત ગ્રામ પંચાયતોને જિલ્લા વિકાસ અધિકારીના હસ્તે પ્રમાણપત્ર એનાયત કરી સન્માનિત કરવામાં આવી હતી.
અધિકારીઓએ પોતાના સંબોધનમાં જણાવ્યું હતું કે સમયસર સારવાર અને પોષણક્ષમ આહારથી ક્ષય રોગ સંપૂર્ણપણે મટી શકે છે. સમાજમાંથી આ રોગ પ્રત્યે રહેલી ગેરમાન્યતાઓ દૂર કરી વ્યાપક જનજાગૃતિ કેળવવી અનિવાર્ય છે. સાવલી ખાતે સંપન્ન થયેલા આ સફળ આયોજનથી સમગ્ર પંથકમાં આરોગ્ય સુરક્ષાનો નવો સંચાર થયો છે અને ટીબી મુક્ત ભારતના સંકલ્પને સ્થાનિક સ્તરે મોટું બળ મળ્યું છે.
