સાબરકાંઠા જિલ્લાના વડાલી વિસ્તારમાં બનેલી એક અત્યંત સંવેદનશીલ અને ગંભીર ઘટનામાં પોક્સો અદાલતે ન્યાયનું ઉત્તમ ઉદાહરણ પૂરું પાડ્યું છે. એક સગીર વયની દીકરીને લલચાવી ફોસલાવીને તેના પર દુષ્કર્મ ગુજારવાના અને તેને ગર્ભવતી બનાવી દેવાના જઘન્ય અપરાધમાં સંડોવાયેલા આરોપીને અદાલતે વીસ વર્ષની દીર્ઘકાલીન કેદની સજા ફટકારી છે. આ ચુકાદાથી ન્યાયતંત્ર દ્વારા દીકરીઓની સુરક્ષા અને અપરાધીઓમાં કાયદાનો ભય ઊભો કરવા માટે એક મજબૂત સંદેશ પાઠવવામાં આવ્યો છે.
ઘટનાની વિગતો અનુસાર, અગાઉ વડાલી પંથકમાં રહેતા એક પરિવારની સગીરાને હિંમતનગર તાલુકાના આગીયોલ ગામમાં રહેતા સંદીપ અરવિંદભાઈ ઉર્ફે ભરત રાવળ નામના શખ્સે દુષ્કર્મ આચવાના ઈરાદાથી અપહરણ કરીને ભગાડી ગયો હતો. આરોપીએ સગીરા પર બળજબરીપૂર્વક દુષ્કર્મ આચર્યું હતું, જેના પરિણામે સગીરા ગર્ભવતી બની હતી. જ્યારે આ ગંભીર બાબતની જાણ સગીરાના વાલીવારસોને થઈ, ત્યારે તેમના પગ નીચેથી જમીન સરકી ગઈ હતી. પરિવારે હિંમત ન હારતા તત્કાલ વડાલી પોલીસ મથકે જઈને આરોપી વિરુદ્ધ પોક્સો અધિનિયમ હેઠળ સત્તાવાર ફરિયાદ નોંધાવી હતી.
પોલીસે આ મામલાની ગંભીરતાને ધ્યાનમાં રાખીને ત્વરિત અને સઘન તપાસ હાથ ધરી હતી અને તમામ પુરાવાઓ એકત્રિત કર્યા બાદ ઈડરની વિશેષ પોક્સો અદાલતમાં ચાર્જશીટ રજૂ કરી હતી. આ કેસની અંતિમ સુનાવણી દરમિયાન સરકારી વકીલ દ્વારા રજૂ કરાયેલી ધારદાર દલીલો, મજબૂત દસ્તાવેજી પુરાવાઓ અને પીડિતાની આપવીતીને અદાલતે ગ્રાહ્ય રાખી હતી. ન્યાયાધીશ એમ. વાય. રાધનપુરવાલાએ ઉપલબ્ધ તમામ પુરાવાઓના આધારે આરોપી સંદીપ રાવળને કસૂરવાર ઠેરવ્યો હતો અને તેને વીસ વર્ષની કેદની સજાનો આદેશ આપ્યો હતો. આ સાથે જ પીડિતાને પુનર્વસન માટે વળતર પેટે એક લાખ રૂપિયા ચૂકવવાનો પણ હુકમ કરવામાં આવ્યો છે.
