ગાંધીનગર સ્થિત શંકરસિંહ વાઘેલા બાપુ ઇન્સ્ટિટ્યૂટ ઑફ લૉ દ્વારા વિદ્યાર્થીઓની તાર્કિક અને વક્તૃત્વ ક્ષમતાને પ્રોત્સાહન આપવાના હેતુથી એક ભવ્ય આંતર-કોલેજ વક્તૃત્વ સ્પર્ધાનું આયોજન કરવામાં આવ્યું હતું. વર્તમાન ડિજિટલ યુગમાં કાયદાકીય શિક્ષણ મેળવી રહેલા યુવાધનને અદ્યતન પ્રવાહોથી માહિતગાર કરવાના ઉદ્દેશ સાથે યોજાયેલી આ સ્પર્ધામાં રાજ્યભરની વિવિધ લૉ કોલેજોના પ્રતિભાશાળી વિદ્યાર્થીઓએ ઉત્સાહભેર ભાગ લીધો હતો.
આ સ્પર્ધાનો મુખ્ય વિષય ‘એઆઈ અને કાયદાનું શાસન: શું ટેક્નોલોજી માનવીય નિર્ણયશક્તિનું સ્થાન લઈ શકે?’ રાખવામાં આવ્યો હતો. આ અત્યંત સાંપ્રત અને ગંભીર વિષય પર પોતાના વક્તવ્ય રજૂ કરતા સ્પર્ધકોએ જણાવ્યું હતું કે ટેક્નોલોજી ગમે તેટલી વિકસિત થાય, પરંતુ તે સંવેદના, નૈતિકતા અને માનવીય અંતરાત્માની અવેજી બની શકતી નથી. વિદ્યાર્થીઓએ કાયદાના શાસન, ન્યાયિક પ્રક્રિયામાં આધુનિક ટેક્નોલોજીની ઉપયોગિતા તેમજ સંભવિત જોખમો વિશે પોતાના વિચારો અત્યંત આત્મવિશ્વાસ, ભાષાકીય સ્પષ્ટતા અને ઊંડા અભ્યાસ સાથે મંચ પરથી રજૂ કર્યા હતા.
આ ગરિમાપૂર્ણ કાર્યક્રમમાં ગાંધીનગરની સમર્પણ પબ્લિક સ્કૂલનાં ડિરેક્ટર ડૉ. રાજી ડેનિસ મુખ્ય અતિથિ તરીકે ઉપસ્થિત રહ્યાં હતાં. તેમણે વિદ્યાર્થીઓને પ્રેરણા આપતાં જણાવ્યું હતું કે યુવા પેઢીએ ટેક્નોલોજીને હથિયાર બનાવવાને બદલે એક સહાયક સાધન તરીકે જોવી જોઈએ જેથી માનવીય મૂલ્યો અકબંધ રહે. આ ઉપરાંત શંકરસિંહ વાઘેલા બાપુ ગ્રૂપ ઑફ ઇન્સ્ટિટ્યૂટ્સનાં ડિરેક્ટર ચિત્રા વાઘેલા પણ વિશેષ અતિથિ તરીકે ઉપસ્થિત રહ્યાં હતાં અને તેમણે વિદ્યાર્થીઓની વૈચારિક પરિપક્વતા તેમજ મંચ પ્રસ્તુતિની મુક્તકંઠે પ્રશંસા કરી હતી. આ કાર્યક્રમ કાયદાના વિદ્યાર્થીઓમાં ઊંડા ચિંતન અને સંશોધન પ્રત્યે રુચિ કેળવવામાં સફળ રહ્યો હતો.
