નવી દિલ્હી સ્થિત દેશની પ્રતિષ્ઠિત જવાહરલાલ નહેરુ યુનિવર્સિટી (જેએનયુ) દ્વારા જાતીય સતામણીના અત્યંત ગંભીર મામલે મોટી કાર્યવાહી કરવામાં આવી છે. યુનિવર્સિટી વહીવટીતંત્રે વિદ્યાર્થિનીઓ સાથે અશોભનીય વર્તન અને જાતીય સતામણીના નવ ગંભીર આરોપો પુરવાર થતાં પ્રોફેસર અંગોમચા બિમોલ અકોઈજામને તાત્કાલિક અસરથી સેવામાંથી બરતરફ કરી દીધા છે. ઉલ્લેખનીય છે કે આ પ્રોફેસર હાલમાં કોંગ્રેસના સાંસદ પણ છે. યુનિવર્સિટીની આંતરિક તપાસ સમિતિએ ઊંડાણપૂર્વકની તપાસ બાદ તેમને દોષિત ઠેરવી પદ પરથી હટાવવાની આકરી ભલામણ કરી હતી.
આંતરિક તપાસ સમિતિના અહેવાલ મુજબ, યુનિવર્સિટીની ઓછામાં ઓછી અગિયાર વિદ્યાર્થિનીઓએ પ્રોફેસર વિરુદ્ધ આક્ષેપો કર્યા હતા. તપાસમાં બહાર આવ્યું છે કે પ્રોફેસર ક્લાસરૂમ તેમજ મૌખિક પરીક્ષા દરમિયાન અભ્યાસને બદલે વિદ્યાર્થિનીઓના અંગત જીવન બાબતે અસભ્ય સવાલો પૂછતા હતા. તેઓ વિદ્યાર્થિનીઓને "તમારે કોઈ બોયફ્રેન્ડ છે?", "તમે તમારા બોયફ્રેન્ડ સાથે કેવી પ્રવૃત્તિઓ કરો છો?", "પ્રેમ સંબંધો વિશે તમારો શો અભિપ્રાય છે?" તેમજ "મારી ઉંમરની વ્યક્તિ તમારી ઉંમરની વ્યક્તિને પસંદ કરે તે અંગે તમે શું વિચારો છો?" જેવા વાંધાજનક સવાલો પૂછીને માનસિક રીતે હેરાન કરતા હતા. એટલું જ નહીં, તેઓ વિદ્યાર્થિનીઓને વેલેન્ટાઈન ડે પર શું કર્યું તે અંગે પણ પૂછતા હતા.
સમિતિના અહેવાલમાં સ્પષ્ટ કરવામાં આવ્યું છે કે પ્રોફેસરનું વર્તન શિક્ષક અને વિદ્યાર્થી વચ્ચેની તમામ વ્યાવસાયિક મર્યાદાઓ ઓળંગનારું હતું. તેમના પર વિદ્યાર્થિનીઓ સાથે અનિચ્છનીય શારીરિક સંપર્ક સાધવો, બિનજરૂરી નિકટતા કેળવવી, જાતીય સંકેતો કરવા અને એક અશ્લીલ ફિલ્મનું અયોગ્ય સ્ક્રિનિંગ કરવાનો પણ આરોપ સાબિત થયો છે. આ ઉપરાંત, તેઓ વર્ગખંડમાં જાતીય સંબંધો સાથે જોડાયેલા દ્વિઅર્થી શબ્દોના અર્થ પૂછીને વિચિત્ર હાવભાવ સાથે તેની અશ્લીલ વ્યાખ્યા સમજાવતા હતા.
તપાસ પેનલે સ્પષ્ટ નોંધ કરી છે કે એકત્રિત કરાયેલા તમામ પુરાવા વિદ્યાર્થિનીઓના આરોપોની સત્યતા સાબિત કરે છે. શૈક્ષણિક પરિસરમાં ગુરુની ગરિમા લજવતા આવા વારંવારના ગેરવર્તનને કોઈપણ સંજોગોમાં સહન કરી શકાય નહીં. પરિણામે, યુનિવર્સિટી પ્રશાસને આ કડક પગલું ભરીને શિક્ષણ જગતમાં વિદ્યાર્થિનીઓની સુરક્ષા અને સન્માન અંગે એક કડક અને દાખલારૂપ સંદેશ આપ્યો છે.
