ગુજરાતમાં નવરાત્રિના પાવન પર્વ પૂર્વે ગરબા રસિકો અને ખેલૈયાઓ માટે રાહતના સમાચાર સામે આવ્યા છે. ચોમાસાની વિદાય બાદ રાજ્યમાં હાલ વરસાદની કોઈ જ શક્યતાઓ સેવાઈ રહી નથી, જેના કારણે આસો નવરાત્રિ દરમિયાન વરસાદનું વિઘ્ન નડશે નહીં તેવી સ્પષ્ટતા હવામાન વિભાગ દ્વારા કરવામાં આવી છે. જોકે, વરસાદી માહોલ પૂર્ણ થયા બાદ હવે સમગ્ર રાજ્યમાં આકરી ગરમી અને અસહ્ય ઉકળાટનું પ્રમાણ વધવા પામ્યું છે. લોકો હાલમાં વહેલી સવારે ગુલાબી ઠંડી અને બપોરે કાળઝાળ ગરમી સાથે બેવડી ઋતુની અનુભૂતિ કરી રહ્યા છે.
હવામાન વિભાગના જણાવ્યા અનુસાર, આગામી પાંચ દિવસ દરમિયાન વાતાવરણ મુખ્યત્વે સૂકું અને સામાન્ય રહેશે. મહત્તમ અને લઘુત્તમ તાપમાનમાં કોઈ મોટો ફેરફાર થવાની શક્યતા નથી. ઉત્તર-પશ્ચિમથી ઉત્તર દિશા તરફથી ફૂંકાતા ગરમ પવનો અને વાતાવરણમાં સર્જાયેલા પ્રતિ-ચક્રવાતી પરિભ્રમણના કારણે ગરમીમાં નોંધપાત્ર વધારો થયો છે. અમદાવાદ શહેરમાં મહત્તમ તાપમાન ૩૭ ડિગ્રી અને લઘુત્તમ તાપમાન ૨૩ ડિગ્રી આસપાસ રહેવાની શક્યતા વ્યક્ત કરવામાં આવી છે.
સૌરાષ્ટ્ર અને કચ્છ પંથકમાં હવામાનનો મિશ્ર મિજાજ જોવા મળી રહ્યો છે. રાજકોટ શહેર સતત ત્રીજા દિવસે રાજ્યનું સૌથી ગરમ શહેર સાબિત થયું છે, જ્યાં ગરમીનો પારો ૩૯.૬ ડિગ્રી સુધી પહોંચી ગયો હતો. સવારે ભેજનું ઊંચું પ્રમાણ અને ધુમ્મસ બાદ બપોરે લોકોએ આકરા તાપનો સામનો કરવો પડ્યો છે. બીજી તરફ, કચ્છના નલિયામાં લઘુત્તમ તાપમાન ઘટીને ૨૧ ડિગ્રી થતાં ધીમા પગલે શિયાળાના આગમનની છડી પોકારાઈ રહી છે.
દક્ષિણ ગુજરાતના સુરત શહેરમાં પણ અચાનક વાતાવરણ બદલાતાં મહત્તમ તાપમાન ૩૭.૨ ડિગ્રી સેલ્સિયસ નોંધાયું છે, જેના કારણે ઓક્ટોબર માસની શરૂઆતમાં જ ગરમીનો પારો ઊંચે ચડી ગયો છે. આકાશ એકદમ સ્વચ્છ હોવાથી સૂર્યના સીધા કિરણો અને વાતાવરણમાં રહેલા ભેજના લીધે લોકો આકરા બફારાથી ત્રાહિમામ પોકારી ઊઠ્યા છે. એકંદરે, વરસાદનું સંકટ ટળતાં ખેલૈયાઓમાં ઉત્સાહ છે, પરંતુ ગરમી અને ઉકળાટ વચ્ચે નવરાત્રિના ઉત્સવની ઉજવણી કરવી પડશે.
