ભારતીય ક્રિકેટમાં અનુભવી ઝડપી બોલર ભુવનેશ્વર કુમારની આશરે ચાર વર્ષના લાંબા ગાળા બાદ રાષ્ટ્રીય ટીમમાં વાપસી થતાં ક્રિકેટ જગતમાં નવી ચર્ચા શરૂ થઈ છે. નવેમ્બર ૨૦૨૨ પછી પહેલી વાર ન્યૂઝીલેન્ડ સામેની આગામી ટી-૨૦ શ્રેણી માટે ભુવનેશ્વરની ભારતીય ટીમમાં પસંદગી કરવામાં આવી છે. ભુવનેશ્વર કુમારના આ પુનરાગમનને પગલે હવે અન્ય એક ઘાતક બોલર મોહમ્મદ શમીના કમબેક અંગે પણ આશા જાગી છે. ભારતીય પસંદગીકારોના આ નિર્ણયથી સ્પષ્ટ સંકેત મળે છે કે સ્થાનિક સ્તરે ઉત્કૃષ્ટ પ્રદર્શન કરનારા અનુભવી ખેલાડીઓ માટે ટીમ ઈન્ડિયાના દરવાજા કાયમ માટે બંધ નથી થતા.
બંગાળ ક્રિકેટ ટીમના મુખ્ય કોચ લક્ષ્મી રતન શુક્લાએ દાવો કર્યો છે કે શમીમાં હજુ પણ આંતરરાષ્ટ્રીય સ્તરે દેશનું પ્રતિનિધિત્વ કરવાની ક્ષમતા અને ધગશ અકબંધ છે. ઘરેલુ ક્રિકેટમાં શમીનું પ્રદર્શન તેની આ વાતની સાબિતી આપે છે. વર્ષ ૨૦૨૫-૨૬ની રણજી ટ્રોફીમાં શમીએ શાનદાર પ્રદર્શન કરતાં માત્ર ૭ મેચમાં ૩૭ વિકેટ ઝડપી હતી અને બંગાળને સેમિફાઇનલ સુધી પહોંચાડવામાં મહત્વની ભૂમિકા નિભાવી હતી. આ ઉપરાંત વિજય હજારે ટ્રોફીમાં તેણે ૭ મેચમાં ૧૫ વિકેટ તેમજ સૈયદ મુશ્તાક અલી ટ્રોફીમાં ૭ મેચમાં ૧૬ વિકેટ ઝડપીને પોતાની ધારદાર બોલિંગ પુરવાર કરી હતી. જોકે, આઈપીએલ ૨૦૨૬માં તેનું પ્રદર્શન પડકારજનક રહ્યું હતું, જ્યાં તેણે ૧૩ મેચમાં ૧૨ વિકેટ ઝડપી હતી અને તેની ઇકોનોમી નવ રન પ્રતિ ઓવરની રહી હતી.
બીજી તરફ, ભુવનેશ્વર કુમારની વાપસીનું મુખ્ય કારણ ઈન્ડિયન પ્રીમિયર લીગમાં તેનું સાતત્યપૂર્ણ પ્રદર્શન રહ્યું છે. તેણે આરસીબી તરફથી રમતાં ૨૦૨૫ અને ૨૦૨૬ની સિઝનમાં કુલ ૪૫ વિકેટ ઝડપી હતી, જેમાં ૨૦૨૬ની સિઝનમાં મેળવેલી ૨૮ વિકેટ મહત્વપૂર્ણ સાબિત થઈ હતી. પૂર્વ ક્રિકેટર હનુમા વિહારી સહિતના કેટલાક નિષ્ણાતોનું માનવું છે કે વર્ષ ૨૦૨૭ના વન-ડે વર્લ્ડ કપને ધ્યાનમાં રાખીને ટીમ મેનેજમેન્ટે અનુભવી ઝડપી બોલરોનો ફરી ઉપયોગ કરવો જોઈએ. હવે જોવાનું એ રહેશે કે ભુવનેશ્વર કુમારની જેમ મોહમ્મદ શમીને પણ ફરી એકવાર દેશનું પ્રતિનિધિત્વ કરવાની તક મળે છે કે નહીં.
