આસામ અને મેઘાલયની સરહદ નજીક એક મોટી અને ભયાનક દુર્ઘટના સામે આવી છે. સરહદી વિસ્તારમાં અચાનક પહાડનો મોટો હિસ્સો ધસી પડતાં નીચે આવેલો એક પેટ્રોલ પંપ ભારે ભૂસ્ખલનની ઝપેટમાં આવી ગયો હતો. પહાડ ધરાશાયી થતાં જ પેટ્રોલ પંપ પર હાજર લોકોમાં ભારે નાસભાગ અને અફરાતફરીનો માહોલ સર્જાયો હતો.
પ્રાથમિક વિગતો મુજબ, પહાડી ઢોળાવ પરથી ભારે માત્રામાં પથ્થરો અને માટીનો કાટમાળ સીધો ફ્યુઅલ સ્ટેશન પર આવી પડ્યો હતો, જેના કારણે પેટ્રોલ પંપના માળખાને ભારે નુકસાન પહોંચ્યું છે. પેટ્રોલ પંપ જેવી અતિ સંવેદનશીલ અને જ્વલનશીલ જગ્યાએ ભૂસ્ખલન થતાં મોટી જાનહાનિ કે આગ લાગવાનો ભય પેદા થયો હતો, જેને પગલે તાત્કાલિક સુરક્ષા પગલાં લેવામાં આવ્યા હતા. કાટમાળ નીચે વાહનો કે સ્થાનિક લોકો દબાયા હોવાની આશંકાને પગલે વહીવટી તંત્ર દ્વારા બચાવ ટીમો રવાના કરવામાં આવી છે.
ઉત્તર-પૂર્વીય વિસ્તારોમાં સતત હવામાન પલટા અને વરસાદને કારણે પહાડી વિસ્તારોમાં ભૂસ્ખલનનું જોખમ વધી ગયું છે. આ ઘટના બાદ આસપાસના માર્ગો પર વાહનવ્યવહાર અટકી પડ્યો હતો. સ્થાનિક ડિઝાસ્ટર મેનેજમેન્ટની ટીમો અને પોલીસ કાફલો ઘટનાસ્થળે પહોંચીને કાટમાળ હટાવવાની તેમજ પરિસ્થિતિ પર કાબૂ મેળવવાની કામગીરી કરી રહ્યા છે. વહીવટીતંત્રે લોકોને આ જોખમી માર્ગો પર સાવચેતીપૂર્વક મુસાફરી કરવાની ચેતવણી આપી છે.
