JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
ગુજરાત

અમદાવાદના વસ્ત્રાલમાં AMCના પાર્કિંગ પ્લોટમાં વાહનોને બદલે જંગલી ઘાસ અને બાંકડાનું સામ્રાજ્ય

અમદાવાદના વસ્ત્રાલમાં AMCના પાર્કિંગ પ્લોટમાં વાહનોને બદલે જંગલી ઘાસ અને બાંકડાનું સામ્રાજ્ય
શહેરમાં એક તરફ ટ્રાફિક અને પાર્કિંગની સમસ્યા વિકરાળ બની રહી છે, ત્યારે વસ્ત્રાલ વોર્ડમાં મ્યુનિસિપલ કોર્પોરેશન દ્વારા બનાવાયેલ પાર્કિંગ પ્લોટ અવાવરું બન્યો છે. વાહનો પાર્ક કરવાની આ કિંમતી જગ્યામાં ગ્રાન્ટના બાંકડા અને જંગલી ઘાસ ઉગી નીકળતા સ્થાનિક રહીશોમાં ભારે રોષ ફેલાયો છે.

અમદાવાદ શહેરમાં દિન-પ્રતિદિન વાહનોની સંખ્યા વધી રહી છે અને તેના કારણે ટ્રાફિક તથા પાર્કિંગની સમસ્યા ગંભીર સ્વરૂપ ધારણ કરી રહી છે. નાગરિકોને વાહન પાર્ક કરવામાં સરળતા રહે તે માટે સત્તાવાળાઓ દ્વારા અલગ-અલગ વિસ્તારોમાં પાર્કિંગ પ્લોટ ફાળવવામાં આવતા હોય છે, પરંતુ પૂર્વ ઝોનના વસ્ત્રાલ વોર્ડમાં AMC દ્વારા બનાવવામાં આવેલા એક અધિકૃત પાર્કિંગ પ્લોટની વાસ્તવિક સ્થિતિ આનાથી તદ્દન વિપરીત છે. બહારથી પાર્કિંગનું બોર્ડ દર્શાવતી આ જગ્યામાં અંદર પ્રવેશતા જ પાર્કિંગ જેવું નામનિશાન જોવા મળતું નથી, જેના કારણે વાહનચાલકો મૂંઝવણમાં મુકાયા છે કે તેઓ પોતાના વાહનો આખરે ક્યાં પાર્ક કરે.

આ પાર્કિંગ પ્લોટની અંદર વાહનોને સ્થાન મળવાને બદલે કોર્પોરેટરોની ગ્રાન્ટમાંથી ખરીદવામાં આવેલા હજારો બાંકડા મોટા જથ્થામાં ગોઠવી દેવામાં આવ્યા છે. વહીવટી તંત્રની ઉદાસીનતા અને જાળવણીના સંપૂર્ણ અભાવના કારણે આ બાંકડાઓ અત્યારે તૂટેલી હાલતમાં અને ચારેય તરફ ફેલાયેલી ગંદકી વચ્ચે ધૂળ ખાઈ રહ્યા છે. પાર્કિંગ માટે અનામત રાખવામાં આવેલી આ કિંમતી જમીન પર બિનજરૂરી ચીજવસ્તુઓનો જમાવડો કરી દેવાને કારણે વાહનચાલકો માટે ગાડી મૂકવાની જગ્યા જ બચી નથી, જે સત્તાવાળાઓની નબળી આયોજન શૈલીનો સ્પષ્ટ પુરાવો પૂરો પાડે છે.

વધુમાં, આ સમગ્ર પ્લોટમાં નિયમિત સફાઈ કે મોનિટરિંગ ન થવાને કારણે ચારેય તરફ મોટા પ્રમાણમાં જંગલી ઘાસ અને ઝાડી-ઝાંખરા ઉગી નીકળ્યા છે. ચોમાસાની ઋતુ પૂરી થયા પછી પણ તંત્ર દ્વારા અહીં કોઈ સફાઈ અભિયાન હાથ ધરવામાં આવ્યું નથી, જેના પરિણામે આખો પ્લોટ કોઈ સૂમસામ અને અવાવરું જગ્યા જેવો ભાસી રહ્યો છે. સ્થાનિક નાગરિકોમાં આ બેદરકારી સામે ભારે રોષ જોવા મળી રહ્યો છે અને વહેલી તકે આ પ્લોટમાંથી બાંકડા હટાવીને તેને વાહન પાર્કિંગ માટે ખુલ્લો મૂકવામાં આવે તેવી પ્રબળ માંગ ઉઠી રહી છે.

ગુજરાત વિભાગના વધુ સમાચાર

LATEST ARTICLES