અમદાવાદના ભવ્ય નરેન્દ્ર મોદી સ્ટેડિયમ ખાતે યોજાયેલા પંજાબી સિંગર અને અભિનેતા દિલજીત દોસાંજના લાઈવ કોન્સર્ટે માત્ર સંગીતપ્રેમીઓનું મન જ નથી મોહી લીધું, પરંતુ સોશિયલ મીડિયા પર એક મોટી ચર્ચા પણ છેડી દીધી છે. વિશાળ મેદની વચ્ચે દિલજીતે પોતાના સંગીત અને ગીતો પર થઈ રહેલી આલોચનાઓનો ખુલ્લેઆમ સામનો કર્યો હતો. તેના ગીતો અને શો સામે વાંધો ઉઠાવનારા વિરોધીઓને સ્ટેજ પરથી જ સીધો અને સણસણતો જવાબ આપીને તેણે સ્પષ્ટ કરી દીધું કે તે પોતાની કલા અને અંદાજ સાથે કોઈ સમજૂતી કરવાના નથી.
પોતાના પર થતી ટીકાઓનો જવાબ આપતા દિલજીતે આંતરરાષ્ટ્રીય સ્તરે પ્રખ્યાત બ્રિટિશ બેન્ડ 'કોલ્ડપ્લે'નું ઉદાહરણ ટાંકીને દેશમાં પ્રવર્તતા બેવડા ધોરણો (ડબલ સ્ટાન્ડર્ડ) પર તીખા પ્રહારો કર્યા હતા. તેણે સવાલ કર્યો કે જ્યારે કોલ્ડપ્લે જેવું વિદેશી બેન્ડ ભારતમાં આવીને દારૂ સંબંધિત ગીતો ગાય છે, ત્યારે કોઈને કોઈ જ વાંધો કે સમસ્યા હોતી નથી, પરંતુ જ્યારે તે પોતે કે કોઈ દેશી કલાકાર સ્ટેજ પર પરફોર્મ કરે છે ત્યારે જ કેમ કેટલાક લોકોને પરેશાની થાય છે? દિલજીતે સ્પષ્ટ કર્યું કે તેને કોલ્ડપ્લેનું સંગીત પસંદ છે, પરંતુ આ બેવડી નીતિ સામે તેનો વિરોધ વ્યાજબી છે.
આ દરમિયાન દિલજીતે પોતાની ભારતીય ઓળખ અને રાષ્ટ્રપ્રેમને ખૂબ જ મજબૂતાઈથી દુનિયા સમક્ષ મૂક્યો હતો. તેણે કટાક્ષ કરતા કહ્યું કે લોકો તેને અને તેની ટીમને એવી રીતે જુએ છે જાણે તેઓ કોઈ વિદેશી ધરતી પરથી આવ્યા હોય, જ્યારે હકીકત એ છે કે તેમનો જન્મ ભારતની જ ધરતી પર થયો છે. સ્ટેજ પર ઉપસ્થિત પોતાના સાથી સંગીતકારો તરફ ઈશારો કરીને તેણે ગર્વથી જણાવ્યું કે આ તમામ કલાકારો ભારતીય છે, જેઓ સાથે મળીને આખી દુનિયામાં ભારતીય અને પંજાબી સંગીતની ધૂમ મચાવી રહ્યા છે.
