અમેરિકાની સૌથી મોટી ગુપ્તચર સંસ્થા નેશનલ સિક્યોરિટી એજન્સી (NSA) એ તાજેતરમાં સ્વીકાર્યું છે કે ગત ૧૭ નવેમ્બરના રોજ તેમના અત્યંત ગુપ્ત આંતરિક સંચાર નેટવર્કમાં ટેકનિકલ સમસ્યા સર્જાઈ હતી. સી અને અન્ય અહેવાલો અનુસાર, એસએનેટ (NSANet) નામના આ નેટવર્કનો ઉપયોગ અધિકારીઓ દ્વારા ટોપ-સીક્રેટ અને અત્યંત સંવેદનશીલ માહિતીની આપ-લે કરવા માટે થાય છે. એજન્સીના જણાવ્યા અનુસાર, નિયમિત જાળવણી (મેન્ટેનન્સ) નું કામ ચાલી રહ્યું હતું તે દરમિયાન આ અસ્થાયી વિક્ષેપ ઊભો થયો હતો, જેના કારણે એજન્સીના હજારો કર્મચારીઓની દૈનિક કામગીરી પ્રભાવિત થઈ હતી.
આ ટેકનિકલ ખામીને કારણે એજન્સી સાથે જોડાયેલા હજારો કર્મચારીઓ મુશ્કેલીમાં મુકાયા હતા અને નેટવર્ક પર એકસાથે વધુ લોડ ન પડે તે માટે સાવચેતીના પગલાં લેવામાં આવ્યા હતા. મેરીલેન્ડના ફોર્ટ મીડ સ્થિત એનએસએના મુખ્ય મથકની કામગીરી યથાવત રહી હતી, પરંતુ સુરક્ષાના ભાગરૂપે કેટલીક પ્રવૃત્તિઓને દેશભરના અન્ય કેન્દ્રો તરફ રીડાયરેક્ટ કરવામાં આવી હતી. એજન્સીના પ્રવક્તાએ સ્પષ્ટતા કરી છે કે નેટવર્કમાં કોઈ સાયબર હુમલો થયો નથી અને આ ઇન્ફ્રાસ્ટ્રક્ચર અણધારી ઘટનાઓ સામે રક્ષણ મેળવવા માટે મજબૂત બેકઅપ સિસ્ટમ સાથે તૈયાર કરવામાં આવ્યું છે.
નોંધનીય છે કે આ ઘટના તાજેતરમાં અમેરિકામાં ટેકનોલોજી ક્ષેત્રે સર્જાયેલી અરાજકતાની શ્રેણીની નવી કડી સમાન છે. આ અગાઉ નવેમ્બર મહિનામાં જ માઈક્રોસોફ્ટના વિશાળ આઉટેજ ઉપરાંત એવિએશન સેક્ટરની નેટવર્ક ફેલ્યોર અને જેપી મોર્ગન ચેઝ તેમજ બેંક ઓફ અમેરિકા જેવી દિગ્ગજ બેંકોમાં ગ્રાહકોને સર્વિસ મેળવવામાં પડી રહેલી મુશ્કેલીઓ સામે આવી હતી. એક પછી એક આવી રહેલી ટેકનિકલ સમસ્યાઓએ ટેકનોલોજી પર વધતી જતી નિર્ભરતા સામે ફરી એકવાર ગંભીર સવાલો ઊભા કર્યા છે, જોકે સંબંધિત સંસ્થાઓ દ્વારા આ તમામ ઘટનાઓ સાયબર હુમલાને બદલે સોફ્ટવેર કે મેન્ટેનન્સ સંબંધિત હોવાનું વારંવાર સ્પષ્ટ કરવામાં આવી રહ્યું છે.
