દેશની સર્વોચ્ચ અદાલતમાં ન્યાયતંત્રની ગરિમા અને મર્યાદાને ઠેસ પહોંચાડતી એક ગંભીર ઘટના સામે આવી છે. ગત ૧૬ નવેમ્બરના રોજ સુપ્રીમ કોર્ટમાં એક કેસની સુનાવણી દરમિયાન વકીલ પ્રવીણ સિંઘલે ખુલ્લી કોર્ટમાં મુખ્ય ન્યાયાધીશ (CJI) સૂર્ય કાંત વિરુદ્ધ અત્યંત વાંધાજનક અને અપમાનજનક ટિપ્પણીઓ કરી હતી. અરજી ફાઇલ કરવા બાબતની પ્રક્રિયાથી નારાજ થયેલા આ વકીલે ન્યાયાધીશની પ્રામાણિકતા પર સવાલ ઉઠાવતા ગંભીર આક્ષેપો કર્યા હતા અને ન્યાયતંત્રના સર્વોચ્ચ પદની ગરિમાને ઠેસ પહોંચે તેવું વર્તન કર્યું હતું. આ મામલાની ગંભીરતાને ધ્યાનમાં રાખીને સુપ્રીમ કોર્ટે સ્વયંભૂ નોંધ લઈને વકીલ વિરુદ્ધ અદાલતના તિરસ્કાર (કન્ટેમ્પ્ટ)ની કાર્યવાહીનો પ્રારંભ કર્યો છે.
આ સમગ્ર વિવાદ સામે આવ્યા બાદ સુપ્રીમ કોર્ટ બાર એસોસિએશન (SCBA) દ્વારા આક્રમક વલણ અપનાવવામાં આવ્યું હતું અને દોષિત વકીલ સામે કડક પગલાં લેવાની પહેલ કરવામાં આવી હતી. કન્ટેમ્પ્ટ પિટિશન દાખલ કરવા માટે ભારતના એટર્ની જનરલની પૂર્વ મંજૂરી મેળવવી અનિવાર્ય હોય છે, જે SCBA દ્વારા મેળવી લેવામાં આવી હતી. આ મામલે જસ્ટિસ દીપાંકર દત્તા, જસ્ટિસ જયમાલ્યા બાગચી અને જસ્ટિસ વી. મોહનાની બેન્ચે જણાવ્યું હતું કે, વકીલ દ્વારા કોર્ટની સત્તાને નીચી દેખાડવાના અને ન્યાયતંત્ર પર આક્ષેપ કરવાના પ્રયાસને ગંભીરતાથી લેવો જરૂરી છે. અદાલતે વકીલને આગામી ૮ જાન્યુઆરી સુધીમાં પોતાનો જવાબ દાખલ કરવા અને ૨૦ જાન્યુઆરીએ સુનાવણી દરમિયાન વ્યક્તિગત રૂપે હાજર રહેવા સ્પષ્ટ આદેશ આપ્યો છે.
અદાલતની આ કાર્યવાહીને કાનૂની જગતમાં આવકાર મળ્યો છે અને ન્યાયતંત્રની પવિત્રતા જાળવી રાખવા માટે કડક પગલાંની જરૂરિયાત પર ભાર મૂકવામાં આવ્યો છે. એસસીબીએના પ્રમુખ અને સિનિયર એડવોકેટ પ્રદીપ રાયે સ્પષ્ટપણે જણાવ્યું હતું કે આવા તત્વો સામે લોખંડી હાથે કામ લેવું પડશે જેથી કોઈ પણ વ્યક્તિ કાયદા અને ન્યાયતંત્રની મર્યાદાઓ સાથે ચેડા કરવાની હિંમત ન કરે. આ ઉપરાંત, હાઈકોર્ટના અનેક પૂર્વ ન્યાયાધીશોએ પણ એક સંયુક્ત નિવેદન બહાર પાડીને ચિંતા વ્યક્ત કરી હતી કે ૧૪૭ કરોડ લોકોની આશાનું કેન્દ્ર એવું ન્યાયતંત્ર કેટલાક હિતધારકોના ષડયંત્રનો ભોગ ન બનવું જોઈએ અને વકીલ આખી સંસ્થાની ગરિમા સાથે રમત રમી શકે નહીં.
