દિલ્હીમાં આગામી ૨૦ થી ૨૨ નવેમ્બર દરમિયાન યોજાનાર શાંઘાઈ કોઓપરેશન ઓર્ગેનાઈઝેશન (SCO) સિવિલાઈઝેશનલ ડાયલોગ ફોરમમાં ભાગ લેવા માટે પાકિસ્તાનના મંત્રી મુસદિક મલિક ભારતની મુલાકાતે આવવાના છે. ભારત સરકાર દ્વારા ઑક્ટોબર મહિનામાં આ બેઠક માટે આમંત્રણ પાઠવવામાં આવ્યું હતું, જેમાં પાકિસ્તાન તરફથી મૂળ મંત્રી ઔરંગઝેબ ખાન ખિચીના બદલે ક્લાઈમેટ મિનિસ્ટર મુસદિક મલિકના નામ પર મહોર મારવામાં આવી છે. વર્ષ ૨૦૨૩ બાદ કોઈ પાકિસ્તાની સંઘીય મંત્રીની આ પહેલી ભારત મુલાકાત હશે, જેને લઈને રાજકીય વર્તુળોમાં ભારે ચર્ચા જાગી છે.
આ મુલાકાત એટલા માટે પણ ખાસ ચર્ચામાં છે કારણ કે મુસદિક મલિકનો ભૂતકાળ ભારત વિરોધી આક્રમક નિવેદનોથી ભરેલો છે. ખાસ કરીને સિંધુ જળ સંધિ (Indus Waters Treaty) અને પાણીની વહેંચણીના મુદ્દે મલિકે અગાઉ અત્યંત ઉશ્કેરણીજનક નિવેદનો આપ્યા હતા. જૂન મહિનામાં એક સેમિનાર દરમિયાન તેમણે ભારતને ખુલ્લી ધમકી આપતા જણાવ્યું હતું કે, "જે કોઈ આપણા પાણીને સ્પર્શ કરશે, તેના હાથ કાપી નાખવામાં આવશે." આ ઉપરાંત દુશાంబే ખાતે યોજાયેલી જળ પરિષદમાં પણ તેમણે ભારત સામે 'વોટર એગ્રેશન'નો આક્ષેપ કરી ૧૯૬૦ની સંધિનું પાલન કરવાની ચેતવણી ઉચ્ચારી હતી.
જો કે, દિલ્હીની આ મુલાકાત દરમિયાન તેઓ દ્વિપક્ષીય વાટાઘાટો કે પાણીના મુદ્દાને સત્તાવાર રીતે ઉઠાવશે કે કેમ તે અંગે મલિકે સ્પષ્ટતા કરી છે કે આ કોઈ દ્વિપક્ષીય વાર્તા નથી. વડાપ્રધાન નરેન્દ્ર મોદીની પહેલથી શરૂ થયેલા આ પ્રથમ 'સિવિલાઈઝેશનલ ડાયલોગ ફોરમ'માં ચીન, રશિયા, ઈરાન સહિત ૧૫ દેશો ભાગ લઈ રહ્યા છે. ઐતિહાસિક પુરાણ કિલ્લા ખાતે યોજાનારી આ બેઠકનો મુખ્ય ઉદ્દેશ્ય સાંસ્કૃતિક સમજ, પરસ્પર વિરાસત અને લોકો વચ્ચેના સંબંધોને મજબૂત કરવાનો છે, ત્યારે પાકિસ્તાની મંત્રીની ઉપસ્થિતિ પર સૌની નજર રહેશે.
