JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
ક્રાઈમ

જામનગરના લાલપુરના આરબલુશ ગામેથી ડિગ્રી વગર ચાલતું બોગસ દવાખાનું ઝડપાયું

જામનગરના લાલપુરના આરબલુશ ગામેથી ડિગ્રી વગર ચાલતું બોગસ દવાખાનું ઝડપાયું
જામનગર SOGની ટીમે લાલપુર તાલુકાના આરબલુશ ગામે દરોડો પાડી કોઈ પણ પ્રકારની અધિકૃત ડિગ્રી વગર ગેરકાયદેસર રીતે મેડિકલ પ્રેક્ટિસ કરતા પારીતોષ બિશ્વાસ નામના શખ્સને ઝડપી પાડ્યો છે.

જામનગર જિલ્લાના લાલપુર તાલુકા અંતર્ગત આવતા આરબલુશ ગામમાં લોકોના આરોગ્ય સાથે ચેડાં કરતી એક ગંભીર ઘટના સામે આવી છે. અહીં એલ.સી.-૮ ગેઈટ સામે આવેલી કોલોનીમાં પારીતોષ મનોજંય બિશ્વાસ નામનો શખ્સ લાંબા સમયથી કોઈ પણ પ્રકારની મેડિકલ ડિગ્રી કે લાયકાત ન હોવા છતાં જાતે જ ડોક્ટર બની બેઠો હતો અને દવાખાનું ચલાવી રહ્યો હતો. આ શખ્સ ગામમાં બીમાર પડતા અજાણ્યા અને અશિક્ષિત દર્દીઓની સારવાર કરવાનું મોટું જોખમ ઉઠાવી રહ્યો હતો, જે બાબતની ગુપ્ત બાતમી જામનગર સ્પેશ્યલ ઓપરેશન ગ્રુપ (SOG)ની ટીમને મળી હતી.

પોલીસ દ્વારા મળેલી બાતમીના આધારે SOGની ટીમે ત્વરિત કાર્યવાહી કરીને ઉપરોક્ત દવાખાના પર અચાનક દરોડો પાડ્યો હતો. આ દરોડા દરમિયાન પોલીસ તપાસમાં ચોંકાવનારી વિગતો બહાર આવી હતી કે આરોપી પારીતોષ પાસે મેડિકલ ક્ષેત્રની કોઈ જ માન્ય કે અધિકૃત ડિગ્રી ઉપલબ્ધ નહોતી. છતાં તે સામાન્ય લોકોની શારીરિક તપાસ કરી, તેમને વિવિધ પ્રકારની એલોપેથિક દવાઓ તેમજ ઈન્જેક્શન આપતો હતો અને બદલામાં દર્દીઓ પાસેથી મસમોટી રકમ પણ વસૂલતો હતો. આમ, તે કોઈપણ જોખમની પરવા કર્યા વિના નિર્દોષ નાગરિકોના જીવ સાથે ખુલ્લેઆમ ચેડાં કરી રહ્યો હતો.

આ દરોડા દરમિયાન પોલીસે સ્થળ પરથી વિવિધ કંપનીઓની દવાઓ, સ્ટેથોસ્કોપ તેમજ અન્ય મેડિકલ સાધનો સહિત કુલ રૂ. ૭,૩૧૭ નો મુદ્દામાલ જપ્ત કર્યો હતો. આ પ્રકરણમાં આરોપી વિરુદ્ધ લાલપુર પોલીસ સ્ટેશન ખાતે મેડિકલ પ્રેક્ટિશનર્સ એક્ટ-૧૯૬૩ની કલમ ૩૦ અને BNSની કલમ ૧૨૫ હેઠળ ગુનો નોંધીને કાયદેસરની કડક કાર્યવાહી હાથ ધરવામાં આવી છે. પોલીસ અધિક્ષક ડૉ. રવિ મોહન સૈનીના માર્ગદર્શન હેઠળ SOGના પોલીસ ઇન્સ્પેક્ટર વી.જે. રાઠોડ અને તેમની ટીમ દ્વારા કરવામાં આવેલી આ સરાહનીય કામગીરીથી ગ્રામ્ય વિસ્તારમાં ગેરકાયદેસર દવાખાના ચલાવતા તત્વોમાં ભારે ફફડાટ વ્યાપી ગયો છે.

LATEST ARTICLES