ભારતીય ઓટોમોબાઈલ ક્ષેત્રે ધમાકેદાર એન્ટ્રી કરવા માટે સજ્જન જિંદાલની આગેવાની હેઠળની જેએસડબલ્યુ મોટર્સે કમર કસી લીધી છે. કંપની તેની પ્રથમ ઇલેક્ટ્રિફાઇડ એસયુવી આગામી મહિને જ લોન્ચ કરવા માટે તૈયાર છે. આ ગાડી ચીનની ચેરી ઓટોમોબાઈલના પ્લેટફોર્મ પર આધારિત છે, જેને ભારતીય રસ્તાઓ અને ડ્રાઇવિંગની પરિસ્થિતિઓ અનુસાર સંપૂર્ણપણે એન્જિનિયરિંગ અને કેલિબ્રેટ કરવામાં આવી છે. જેએસડબલ્યુ ગ્રૂપના આ નવા વાહન પ્રોજેક્ટ દ્વારા ભારતીય ગ્રાહકોને પ્રથમ દિવસથી જ વર્લ્ડ ક્લાસ પ્લગ-ઈન હાઈબ્રિડ અને ઇલેક્ટ્રિક ટેક્નોલોજી ઉપલબ્ધ થશે. કંપનીએ સ્પષ્ટ કર્યું છે કે આ વાહનના માધ્યમથી દેશમાં સ્થાનિક સપ્લાય ચેઈનને વધુ મજબૂત બનાવવામાં આવી રહી છે.
આ મહત્ત્વાકાંક્ષી પ્રોજેક્ટ માટે કંપનીએ ભારતની મોથરસન, ઉનો મિંડા, ટાટા એલ્સી, એરટેલ અને કેપીઆઈટી જેવી નામાંકિત કંપનીઓ ઉપરાંત જાપાન, દક્ષિણ કોરિયા, ફ્રાન્સ, જર્મની અને સ્પેનની દિગ્ગજ વૈશ્વિક કંપનીઓ સાથે હાથ મિલાવ્યા છે. મહારાષ્ટ્રના છત્રપતિ સંભાજીનગર ખાતે આવેલા ૬૦૦ એકરમાં ફેલાયેલા કંપનીના ગ્રીનફિલ્ડ મેન્યુફેક્ચરિંગ પ્લાન્ટમાં વાર્ષિક ૫,૦૦,૦૦૦ વાહનોના ઉત્પાદનની ક્ષમતા છે, જેના માટે ૨૭,૦૦૦ કરોડ રૂપિયાથી વધુનું રોકાણ કરવામાં આવ્યું છે. વાહનની સુરક્ષા અને ડેટા પ્રાઈવસીને ધ્યાનમાં રાખીને તમામ કનેક્ટેડ કાર ડેટા અને કેમેરા ફૂટેજ ભારતમાં જ એમેઝોન વેબ સર્વિસીઝ (AWS) ના સર્વર પર સુરક્ષિત રાખવામાં આવશે અને ભારતીય કાયદાઓનું સંપૂર્ણ પાલન કરવામાં આવશે.
જેએસડબલ્યુ મોટર્સ માત્ર આ એક જ વાહન સુધી સીમિત નહીં રહે, પરંતુ ભવિષ્યમાં બેટરી-ઇલેક્ટ્રિફાઇડ વાહનો અને અન્ય ક્લીન-એનજી ગ્રીન મોડેલ્સ પણ બજારમાં ઉતારવાની યોજના ધરાવે છે. આ વાહનોના સોફ્ટવેરથી લઈને એલોય વ્હીલ્સ, ટાયર્સ, લુબ્રિકન્ટ્સ અને બેટરી સુધીના મોટાભાગના પાર્ટ્સનું ભારતીય ધોરણો અનુસાર સ્થાનીયકરણ (લોકલાઇઝેશન) કરવામાં આવી રહ્યું છે જેથી ગ્રાહકોને ઉત્તમ આફ્ટર-સેલ્સ સર્વિસ અને સસ્તો અનુભવ મળી શકે. ટાટા મોટર્સ અને મહિન્દ્રા એન્ડ મહિન્દ્રા જેવી સ્વદેશી કંપનીઓની હરોળમાં ઊભી રહેતી જેએસડબલ્યુ મોટર્સની આ પહેલ ભારતીય ઓટો સેક્ટરમાં એક નવો ક્રાંતિકારી અધ્યાય લખવા જઈ રહી છે.
