ઘટનાની વિગતો મુજબ, ગત ૧૪ નવેમ્બરની રાત્રે દાણીલીમડા વિસ્તારમાં રહેતા મોહમદ શાલર લાલમોહમદ શેખ અને તેમના મિત્ર મુનાફ યુસુફભાઈ શેખને લોડિંગ રિક્ષાના ચાલક વસીમ સલીમભાઈ લીલગરે ફર્નિચરનો સામાન વટવા નવાપુરા ખાતે ઉતારવા માટે બોલાવ્યા હતા. આ કામ પૂર્ણ કરીને ત્રણેય જણા લોડિંગ રિક્ષામાં સવાર થઈને પરત દાણીલીમડા તરફ રવાના થયા હતા. તે દરમિયાન જ્યારે તેમની રિક્ષા વટવા-ઇસનપુર રોડ પર આવેલ ગેબનશા પીર દરગાહ કેનાલ ચાર રસ્તા પાસે પહોંચી, ત્યારે પાછળથી પૂરઝડપે અને બેફામ ગતિએ આવી રહેલી વરના કારે રિક્ષાને ગંભીર ટક્કર મારી હતી.
આ ટક્કર इतनी ભયાનક હતી કે લોડિંગ રિક્ષાની પાછળની બોડીનો ભાગ તૂટીને અલગ થઈ ગયો હતો અને રિક્ષા ફૂટપાથ સાથે અથડાઈને અટકી ગઈ હતી. અકસ્માતના આ જોરદાર આંચકાને કારણે રિક્ષામાં સવાર ત્રણેય વ્યક્તિઓ હવામાં ઉછળીને સીધા રસ્તા પર ફંગોળાયા હતા, જેના પરિણામે તેમને શરીરના ભાગે ગંભીર ઈજાઓ પહોંચી હતી. બીજી બાજુ, રિક્ષાને અડફેટે લીધા બાદ અનિયંત્રિત બનેલી કાર નજીકમાં આવેલા ઇલેક્ટ્રિક થાંભલા અને કેનાલની દીવાલ સાથે ધડાકાભેર અથકાઈને ઊભી રહી ગઈ હતી. આ અકસ્માતને પગલે આસપાસના લોકોના ટોળા ઘટનાસ્થળે ભેગા થઈ ગયા હતા, જેનો લાભ લઈને કારચાલક પોતાની વાહન ઘટનાસ્થળે જ મૂકીને નાસી છૂટવામાં સફળ રહ્યો હતો.
અકસ્માતની આ ગંભીર ઘટના બાદ સ્થાનિક લોકોની મદદથી ઈજાગ્રસ્ત ત્રણેય વ્યક્તિઓને તાત્કાલિક ધોરણે નજીકની હોસ્પિટલમાં સારવાર માટે ખસેડવામાં આવ્યા હતા. આ મામલે જે-ડિવિઝન ટ્રાફિક પોલીસ મથકે ગુનો નોંધવામાં આવ્યો છે અને પ્રાથમિક તપાસમાં અકસ્માત સર્જનાર કાર મહેસાણા પાસિંગની હોવાનું બહાર આવ્યું છે. પોલીસે નાસી છૂટેલા કારચાલકને ઝડપી પાડવા માટે આસપાસના સીસીટીવી ફૂટેજ અને અન્ય ટેકનિકલ પુરાવાઓની મદદથી સઘન તપાસના ચક્રો ગતિમાન કર્યા છે.
