કેન્દ્રીય ગૃહ મંત્રાલયના નેતૃત્વ હેઠળ કાર્યરત 'બ્યુરો ઓફ પોલીસ રિસર્ચ એન્ડ ડેવલપમેન્ટ' (BPR&D) દ્વારા દેશના શૈક્ષણિક સંકુલો, વિદ્વાનો અને રિસર્ચ સ્કોલર્સ માટે એક મહત્વપૂર્ણ સંશોધન કાર્યક્રમની જાહેરાત કરવામાં આવી છે. આ કાર્યક્રમ અંતર્ગત વર્ષ ૨૦૨૬-૨૭ માટે પોલીસ પ્રશાસન, જેલ સુધારણા અને ફોજદારી ન્યાય પ્રણાલી સામે ઊભા થતા આધુનિક પડકારો અંગે સંશોધન પ્રસ્તાવો આમંત્રિત કરવામાં આવ્યા છે. આ યોજનાનો મુખ્ય ઉદ્દેશ્ય ગુનાહિત ન્યાય પ્રણાલીમાં રહેલી ખામીઓને દૂર કરી, નવીન પદ્ધતિઓ અને નીતિગત હસ્તક્ષેપ દ્વારા સમગ્ર વ્યવસ્થાને વધુ સચોટ અને લોકઉપયોગી બનાવવાનો છે.
આ સંશોધન કાર્યક્રમમાં ભાગ લેવા માટે દેશભરના નિષ્ણાત સંશોધકો અને શૈક્ષણિક સંસ્થાઓ ઉત્સાહભેર અરજી કરી શકશે. પ્રસ્તાવો મુખ્યત્વે સમકાલીન મુદ્દાઓ, પોલીસ કાર્યવાહીમાં નવીન પદ્ધતિઓ અને જમીની સ્તરે આવતી મુશ્કેલીઓના વ્યવહારુ ઉકેલો પર કેન્દ્રિત હોવા જોઈએ. આ પહેલ માત્ર સંશોધકોને જ નહીં, પરંતુ સુરક્ષા અને કાયદો-વ્યવસ્થા જાળવતી એજન્સીઓને પણ વૈજ્ઞાનિક અને તાર્કિક અભિગમ અપનાવવામાં મદદરૂપ સાબિત થશે, જેનાથી ભવિષ્યની પોલીસ નીતિઓ ઘડવામાં મોટું યોગદાન મળી રહેશે.
રસ ધરાવતા ઉમેદવારો અને સંસ્થાએ આ પ્રક્રિયામાં જોડાવા માટે બ્યુરોની સત્તાવાર વેબસાઇટ bprd.mha.gov.in ની મુલાકાત લઈને જરૂરી માર્ગદર્શિકા અને પાત્રતાની શતો ચકાસી લેવાની રહેશે. તમામ અરજદારોએ નિયત તારીખ એટલે કે ૨૭ નવેમ્બર, ૨૦૨૬ પહેલાં પોતાના પ્રસ્તાવો ઓનલાઈન અથવા નિર્ધારિત માધ્યમથી સબમિટ કરવાના રહેશે. નિર્ધારિત સમયમર્યાદામાં આવેલા પ્રસ્તાવોની ચકાસણી કરીને બ્યુરો દ્વારા આગામી સંશોધન પ્રોજેક્ટ્સ માટે યોગ્ય ઉમેદવારોની પસંદગી કરવામાં આવશે.
