અમદાવાદના પોશ ગણાતા શીલજ સર્કલ અને બોપલ વિસ્તારમાં બનેલી એક હૃદયદ્રાવક ઘટનાએ સમગ્ર શહેરમાં હડકંપ મચાવી દીધો છે. પૂરપાટ ઝડપે આવી રહેલી એક લક્ઝુરિયસ રેન્જ રોવર કારે એક નિર્દોષ યુવકને અફેટે લેતા તેણે ઘટનાસ્થળે જ પોતાનો જીવ ગુમાવ્યો હતો. આ ગંભીર અકસ્માત બાદ સ્થાનિક પોલીસ દ્વારા જે પ્રકારની ત્વરિત અને હળવી કાર્યવાહી કરવામાં આવી છે, તેણે કાયદાના શાસન સામે જ મોટા સવાલો ખડા કર્યા છે. અકસ્માત સર્જનાર આરોપી રાઘવેન્દ્ર કુશવાહ, જે બાપુનગરના ધારાસભ્યનો ભત્રીજો હોવાનું ચર્ચાઈ રહ્યું છે, તેને ગંભીર ગુનાના બદલે પોલીસ સ્ટેશનમાંથી જ સહેલાઈથી જામીન પર મુક્ત કરી દેવામાં આવ્યો છે. એક નાગરિકનો જીવ ગયો હોવા છતાં પોલીસનું આ નરમ વલણ ન્યાયતંત્રની પારદર્શિતા સામે શંકાની સોય તાણે છે.
આ સમગ્ર પ્રકરણમાં સૌથી મોટો અને વિવાદાસ્પદ મુદ્દો આરોપીએ અકસ્માત વખતે નશો કર્યો હતો કે નહીં તે અંગેનો છે. ઘટનાના કલાકો વીતી જવા છતાં પોલીસ વિભાગ દ્વારા આરોપીના બ્લડ ટેસ્ટ (લોહીના નમૂના) કરાવવામાં આવ્યા છે કે કેમ અને તેનો રિપોર્ટ ક્યાં છે તે અંગે કોઈ જ સત્તાવાર ખુલાસો કરવામાં આવ્યો નથી. જો મેડિકલ ટેસ્ટ થયા જ ન હોય તો તે પોલીસ તંત્રની અત્યંત ગંભીર બેદરકારી ગણાય છે, અને જો ટેસ્ટ થયા હોય તો તેના પુરાવાઓ સાર્વજનિક કરવામાં પોલીસ ક્યાંક ને ક્યાંક સંકોચ અનુભવી રહી છે. પોલીસનું આ શંકાસ્પદ મૌન રાજકીય દબાણ અથવા તપાસમાં રહેલી ગંભીર કચાશ તરફ સ્પષ્ટ ઈશારો કરે છે, જેના કારણે સામાન્ય જનતામાં ભારે આશંકા અને રોષની લાગણી પ્રવર્તી રહી છે.
નિર્દોષ યુવકના પરિવારને ન્યાય અપાવવા માટે હવે આ મામેલ નિષ્પક્ષ અને ઉચ્ચ સ્તરીય તપાસ થાય તેવી પ્રબળ લોકમાગ ઉઠી છે. કાયદો દરેક નાગરિક માટે સમાન હોવો જોઈએ, પરંતુ જ્યારે સત્તા કે રાજકીય વગ ધરાવતા લોકો સંડોવાયેલા હોય ત્યારે તપાસની દિશા બદલાઈ જતી હોવાની છાપ આ કેસમાં ઉપસી રહી છે. મૃતકના પરિવારજનોને સાચો ન્યાય મળે અને બ્લડ ટેસ્ટ સહિતના તમામ મેડિકલ પુરાવાઓ બાબતે દૂધનું દૂધ અને પાણીનું પાણી થાય તે અત્યંત આવશ્યક છે. જો આ મામેલે કડક પગલાં નહીં લેવાય તો કાયદા પરથી સામાન્ય લોકોનો વિશ્વાસ ડગમગી જશે, જેથી જવાબદાર અધિકારીઓની ભૂમિકાની પણ તટસ્થ તપાસ થવી જોઈએ.
