વિશ્વભરમાં આર્ટિફિશિયલ ઇન્ટેલિજન્સ અને સેમિકન્ડક્ટર ક્ષેત્રે મોખરાનું સ્થાન ધરાવતી કંપની એનવીડિયાના મુખ્ય કાર્યકારી અધિકારી જેન્સન હુઆંગ હાલમાં ભારે મુશ્કેલીમાં મુકાયા છે. 'ધ વોલ સ્ટ્રીટ જર્નલ' અને 'ધ ઇન્ફર્મેશન' જેવા પ્રતિષ્ઠિત અહેવાલો અનુસાર, જેન્સન હુઆંગના સંબંધો ચીની એક્ઝિક્યુટિવ એલિસ હુઆંગ સાથે હતા, જેઓ બેઇજિંગ માટે જાસૂસી કરતી હોવાની શંકાના ઘેરાવામાં છે. આ પ્રકરણમાં સૌથી મોટો ટ્વિસ્ટ એ છે કે કાંગ વેઈ નામના ચીની બિઝનેસમેને જ જેન્સન હુઆંગ સાથે દસ વર્ષ પહેલાં પોતાની પત્ની એલિસનો પરિચય કરાવ્યો હતો, જે તે સમયે વીડિયો ગેમ કંપનીઓ સાથે જોડાયેલા પ્રાઈવેટ ઇક્વિટી ઇન્વેસ્ટર હતા.
અહેવાલો મુજબ, કાંગ વેઈ લગભગ બે વર્ષ સુધી પોતાની પત્ની અને એનવીડિયાના CEO વચ્ચેના આ રોમાન્ટિક સંબંધોથી માહિતગાર હોવા છતાં તેને સહન કરતો હતો અને ખુલ્લેઆમ મજાકમાં પોતાની પત્નીને જેન્સનની અંગત સચિવ તરીકે પણ ઓળખાવતો હતો. આ દંપતીએ તેમના વ્યક્તિગત સંબંધોનો ઉપયોગ ચીન, સિંગાપોર અને તાઇવાન જેવા દેશોમાં ગેમિંગ, ફાર્માસ્યુટિકલ્સ અને ક્લાઉડ કમ્પ્યુટિંગ જેવા વિવિધ વેપારી સાહસોમાં ફાયદો મેળવવા માટે કર્યો હતો. જો કે, અગાઉ આ દંપતી નિયમનકારી મુશ્કેલીઓમાં પણ ફસાઈ ચૂક્યું છે, જેમાં 2018માં ચીનના સિક્યોરિટીઝ નિયમનકાર દ્વારા કાંગની કંપની પર લાખો યુઆનનો દંડ ફટકારવામાં આવ્યો હતો.
હાલની પરિસ્થિતિમાં, એનવીડિયાના શક્તિશાળી AI ચિપ્સ આ દંપતીના વેપારી નેટવર્ક અને કથિત ગેરરીતિઓના કેન્દ્રમાં હોવાની ચર્ચાએ જોર પકડ્યું છે. એલિસ હુઆંગ અગાઉ ટેલિવિઝન પ્રેઝન્ટેકર રહી ચૂકી છે અને બાદમાં આર્ટિફિશિયલ ઇન્ટેલિજન્સ તથા ડેટા સેન્ટરના ક્ષેત્રમાં સક્રિય બની હતી. જેન્સન હુઆંગના આ વિવાદાસ્પદ સંબંધો અને ચીની જાસૂસીના સંભવિત જોખમને કારણે ટેકનોલોજી જગતમાં અને એનવીડિયા કંપનીની અંદર પણ ભારે હલચલ મચી ગઈ છે, જે આગામી સમયમાં તેમના પદ અને પ્રતિષ્ઠા પર ગંભીર અસર કરી શકે છે.
