દિવાળીની રોનક અને તહેવારની ખરીદી વચ્ચે સાયબર ગુનેગારોએ સામાન્ય નાગરિકોને નિશાન બનાવવા માટે એક નવો અને ખતરનાક કિમીયો અપનાવ્યો છે. સોશિયલ મીડિયા અને મેસેજિંગ પ્લેટફોર્મ પર પ્રધાનમંત્રી યોજનાના નામે વાયરલ થઈ રહેલા એક નકલી સંદેશમાં નાગરિકોને દિવાળી બોનસ પેટે 8,000 રૂપિયા આપવાની લોભામણી લાલચ આપવામાં આવી રહી છે. આ વાયરલ મેસેજ માત્ર ગુજરાતી જ નહીં પરંતુ હિન્દી, બંગાળી અને અન્ય અનેક પ્રાદેશિક ભાષાઓમાં પણ મોટા પ્રમાણમાં ફેલાવાઈ રહ્યો છે, જેથી વધુને વધુ લોકો તેમની જાળમાં ફસાઈ શકે. તહેવારોની મોસમમાં લોકોની લાગણીઓ અને આર્થિક લાભ મેળવવાની ઘેલછાનો ફાયદો ઉઠાવીને આ ઠગો નિર્દોષ નાગરિકોની અંગત માહિતી અને મહેનતની કમાણી ચોરવાના નાપાક મનસૂબા પાર પાડી રહ્યા છે.
આ ઠગાઈનો મુખ્ય મિકેનિઝમ એક ખાસ પ્રકારની લિંક અને APK ફાઇલ દ્વારા કામ કરે છે. જેવો કોઈ નાગરિક લાલચમાં આવીને આ મેસેજમાં આપેલી લિંક પર ક્લિક કરે છે, કે તુરંત જ તેમના મોબાઈલમાં એક હાનિકારક APK ફાઇલ ઓટોમેટિક ડાઉનલોડ થઈ જાય છે. ત્યારબાદ બોનસ મેળવવાની પ્રક્રિયાના નાટકરૂપે અલગ-અલગ નકલી પેજ ખોલવામાં આવે છે. આ આખી પ્રોસેસ પાછળ ઠગોનો મુખ્ય હેતુ પીડિતના મોબાઈલ ફોનનો સંપૂર્ણ રિમોટ એક્સેસ મેળવવાનો હોય છે. એકવાર ફોનનો કાબૂ ઠગોના હાથમાં આવી જાય પછી તેઓ WhatsApp, Telegram જેવી મેસેજિંગ એપ્લિકેશન્સ તેમજ મોબાઈલ બેંકિંગ એપ્લિકેશન્સની અત્યંત ખાનગી અને નાણાકીય વિગતો સહેલાઈથી ચોરીને બેંક ખાતા ખાલી કરી નાખે છે.
આ ગંભીર સ્થિતિને ધ્યાનમાં રાખીને અમદાવાદ સાયબર ક્રાઇમ બ્રાન્ચના ડીસીપી લવિના સિન્હાએ સ્પષ્ટતા કરી છે કે કેન્દ્ર કે રાજ્ય સરકાર દ્વારા આવી કોઈ પણ પ્રકારના દિવાળી બોનસની જાહેરાત કરવામાં આવી નથી. આ પ્રકારના તમામ મેસેજ સંપૂર્ણપણે નકલી અને ફ્રોડ છે. સાયબર ઠગાઈના આ વધતા જોખમથી બચવા માટે નાગરિકોએ કોઈપણ અજાણી લિંક કે APK ફાઇલ ડાઉનલોડ કરવાનું સદંતર ટાળવું જોઈએ અને કોઈપણ માહિતી માટે માત્ર સત્તાવાર સરકારી વેબસાઇટ્સ પર જ ભરોસો કરવો જોઈએ. જો કોઈ દુર્ભાગ્યવશ આ ફ્રોડનો ભોગ બની જાય, તો તુરંત જ સાયબર હેલ્પલાઇન નંબર 1930 પર અથવા નજીકના પોલીસ સ્ટેશને સંપર્ક કરવો જેથી સમયસર જરૂરી પગલાં લઈ શકાય.
