પંજાબની આંતરરાષ્ટ્રીય સરહદ પર સરહદ પારથી ચાલતા ગુનાહિત નેટવર્કમાં હવે આધુનિક ટેકનોલોજીનો ઉપયોગ થઈ રહ્યો હોવાનો ચોંકાવનારો ખુલાસો થયો છે. પોલીસ તપાસમાં બહાર આવ્યું છે કે વિદેશી હેન્ડલર્સના ઈશારે સરહદ પારથી ડ્રોન દ્વારા હેરોઈન, અફીણ અને આધુનિક હથિયારોના જથ્થા ફેંકવામાં આવે છે, જેને શોધીને સચોટ રીતે બહાર કાઢવા માટે જીપીએસ ટ્રેકિંગ ડિવાઈસનો ઉપયોગ કરવામાં આવી રહ્યો છે. અવણ લાખા સિંહ ગામ પાસેથી ૭.૯ કિલો હેરોઈન સાથે મળી આવેલા જીપીએસ ટ્રેકરે સુરક્ષા એજન્સીઓની ચિંતા વધારી દીધી છે, કારણ કે આ ઉપકરણની મદદથી સ્થાનિક ઓપરેટરો ડ્રોન દ્વારા ડ્રોપ થયેલા ચોક્કસ સ્થળની સચોટ માહિતી મેળવીને માલ સહેલાઈથી ઉઠાવી લેતા હતા.
અમૃતસર ગ્રામ્ય પોલીસે કેન્દ્રીય એજન્સીઓ અને બીએસએફ સાથે મળીને હાથ ધરેલા આ વ્યાપક અભિયાનમાં માત્ર ડ્રગ્સ જ નહીં પરંતુ અત્યંત ખતરનાક શસ્ત્રો પણ જપ્ત કરવામાં આવ્યા છે. પોલીસ કાર્યવાહી દરમિયાન એક આરપીજી (રોકેટ પ્રોપેલ્ડ ગ્રેનેડ) લોન્ચર, બે ૯ એમએમ ગ્લોક પિસ્તોલ, જીવંત કારતુસો ઉપરાંત ૭.૯ કિલો હેરોઈન, ૫.૧ કિલો અફીણ અને ૨.૩ કિલો આઈસ (મેથામ્ફેટામાઈન) ડ્રગ્સ જપ્ત કરવામાં આવ્યું છે. આ નેટવર્કની તપાસ દરમિયાન અજનાલા વિસ્તારના બલકાર સિંહ નામના વ્યક્તિની ધરપકડ કરવામાં આવી છે, જેની ખેતીની જમીન આંતરરાષ્ટ્રીય સરહદી વાડને અડકીને આવેલી છે. પ્રાથમિક તપાસ મુજબ તે સરહદ પારથી ડ્રોન દ્વારા ડ્રગ્સનો જથ્થો મંગાવવામાં મુખ્ય ભૂમિકા ભજવતો હતો અને સ્થાનિક યુવાનો દ્વારા તેનું વિતરણ કરાવતો હતો.
આ સમગ્ર કાવતરામાં સગીરો સહિતના સ્થાનિક યુવાનોને જમીની સ્તરના ઓપરેટર તરીકે ફસાવવામાં આવતા હોવાનું પણ સામે આવ્યું છે, જે સુરક્ષા એજન્સીઓ માટે ચિંતાનો વિષય બન્યો છે. ડીજીપી ગૌરવ યાદવના જણાવ્યા અનુસાર, પકડાયેલા આરોપીઓ વિદેશમાં બેઠેલા હેન્ડલર્સના સતત સંપર્કમાં હતા અને ગુનાહિત તત્વોને હથિયારો તથા નશીલા પદાર્થો પૂરા પાડતા હતા. પોલીસ હવે આંતરરાષ્ટ્રીય રેકેટના મૂળ સુધી પહોંચવા માટે સપ્લાય ચેઈન, જીપીએસ ટ્રેકરના સ્ત્રોત અને આ હથિયારોના અંતિમ મેળવનાર શખ્સોની સઘન તપાસ કરી રહી છે. આ મામલે વિવિધ પોલીસ સ્ટેશનોમાં એનડીપીએસ એક્ટ, આર્મ્સ એક્ટ અને એક્સપ્લોઝિવ સબસ્ટેન્સ એક્ટ હેઠળ ગુના દાખલ કરવામાં આવ્યા છે.
