દેશની અગ્રણી ફાસ્ટ મૂવિંગ કન્ઝ્યુમર ગુડ્સ (FMCG) કંપની હિન્દુસ્તાન યુનિલિવર લિમિટેડ (HUL) દ્વારા રોજિંદા વપરાશની ચીજવસ્તુઓના ભાવમાં નોંધપાત્ર વધારો કરવામાં આવ્યો છે. કંપનીએ સર્ફ એક્સેલ, રિન અને વ્હીલ જેવી લોકપ્રિય બ્રાન્ડ્સના વિવિધ પેકેટની કિંમતોમાં 11 ટકા સુધીનો વધારો ઝીંક્યો છે. તહેવારોની ખુશીના માહોલ વચ્ચે આવેલા આ અચાનક ભાવવધારાથી સામાન્ય પરિવારોના રસોડા અને ઘરખર્ચના બજેટ પર સીધી અસર પડી છે, કારણ કે હવે ગ્રાહકોએ ડિટર્જન્ટ અને સાબુ ખરીદવા માટે વધુ ખિસ્સા ખાલી કરવા પડશે.
કંપની દ્વારા કરવામાં આવેલા આ ફેરફાર હેઠળ સર્ફ એક્સેલ ક્વિક વોશના 1 કિલોગ્રામ પેકની કિંમત વધારીને રૂ. 245 કરવામાં આવી છે, જ્યારે 500 ગ્રામ પેક માટે રૂ. 128 ચૂકવવા પડશે. આ ઉપરાંત, સર્ફ એક્સેલ ઇઝી વોશ તેમજ તેના સાબુના ભાવમાં પણ રૂ. 3થી રૂ. 10 સુધીનો વધારો નોંધાયો છે. માત્ર સર્ફ એક્સેલ જ નહીં, પરંતુ રિન ડિટર્જન્ટ પાવડર, રિન આલા અને વ્હીલ પાવડરના વિવિધ પેકેટ્સ તેમજ લોકપ્રિય મોતી ગુલાબ સાબુના 150 ગ્રામના પેકમાં પણ 10 ટકાથી વધુનો ભાવવધારો કરવામાં આવ્યો છે.
કંપનીના જણાવ્યા અનુસાર, કાચા માલના વધતા ખર્ચ અને કોમોડિટી મોંઘવારી વચ્ચે નફાનું માર્જિન જાળવી રાખવા માટે આ નિર્ણય અનિવાર્ય બન્યો હતો. FMCG ક્ષેત્રમાં કાચા માલની સતત વધઘટ મોટો પડકાર બની રહી છે, જેના કારણે કંપનીઓ સમયાંતરે ઉત્પાદનોના ભાવમાં ફેરફાર કરતી હોય છે. આમ છતાં, આ વધારાને કારણે સામાન્ય જનતા પર આર્થિક બોજ વધુ એક વખત વધી ગયો છે અને આગામી દિવસોમાં ઘરવપરાશની વસ્તુઓની ખરીદી મોંઘી સાબિત થશે.
