આર્ટિફિશિયલ ઇન્ટેલિજન્સ (AI) ક્ષેત્રે સૌથી મોટી હાઇપ્રોફાઇલ નિમણૂકોમાંની એક એવી ઘટના સામે આવી છે, જ્યાં Scale AI ના સહ-સ્થાપક અને હાલમાં મેટા સુપરઇન્ટેલિજન્સ લેબ્સનું નેતૃત્વ કરી રહેલા ૨૯ વર્ષીય એલેક્ઝાન્ડર વાંગે માર્ક ઝકરબર્ગ સાથેની ભાગીદારીના મૂળ પાયાની જાહેરાત કરી છે. એપ્રિલ ૨૦૨૫ માં મેટાના લામા-૪ મોડેલને સાધારણ પ્રતિસાદ મળ્યા બાદ, માર્ક ઝકરબર્ગે વોટ્સએપ મેસેજ દ્વારા વાંગનો સંપર્ક કર્યો હતો અને ૪૪ મિનિટ લાંબી ટેલિફોનિક ચર્ચા થઈ હતી. આ વાતચીતના માત્ર બે દિવસ બાદ વાંગે ઝકરબર્ગને એક વિગતવાર નોટ મોકલી હતી, જેમાં તેમણે સ્પષ્ટ કર્યું હતું કે જો તેઓ મેટાના એઆઈ ડિવિઝનની કમાન સંભાળે તો તેમની રણનીતિ શું હશે. આ મેમોનો મુખ્ય ઉદ્દેશ્ય માત્ર મોટા પ્રમાણમાં કર્મચારીઓ રાખવાનો નહીં, પરંતુ ઉચ્ચતમ પ્રતિભા (ટેલેન્ટ ડેન્સિટી) પર ધ્યાન કેન્દ્રિત કરવાનો હતો.
માર્ક ઝકરબર્ગે આ પ્રસ્તાવને સ્વીકારીને એઆઈ ક્ષેત્રે મોટું પરિવર્તન લાવવાની તૈયારી દર્શાવી હતી અને જૂની દિશા બદલીને શૂન્યમાંથી ફરી શરૂઆત કરવાના સિદ્ધાંતને અપનાવ્યો હતો. ઝકરબર્ગે અનેક લેબના વડાઓ સાથે ચર્ચા કરવા છતાં વાંગને જ આ મહત્વપૂર્ણ જવાબદારી માટે યોગ્ય વ્યક્તિ ગણ્યા હતા. આ નિમણૂક પાછળ મેટાએ મોટું રોકાણ કર્યું હતું, જેમાં Scale AI નો ૪૯ ટકા હિસ્સો ખરીદવા માટે ૧૪.૩ અબજ ડોલર ચૂકવવામાં આવ્યા હતા અને ઓપનએઆઈ (OpenAI) ના રિસર્ચર્સને આકર્ષવા માટે ૧૦૦ મિલિયન ડોલર સુધીના પેકેજ ઓફર કરવામાં આવ્યા હતા. મેટાની આ કોર રિસર્ચ ટીમમાં ૨૦0 કરતા પણ ઓછા લોકો કાર્યરત છે, છતાં તેમણે ટૂંકા સમયમાં જ શાનદાર પરિણામો આપવાનું શરૂ કરી દીધું છે.
આ રણનીતિના પરિણામે એપ્રિલમાં લેબનું પહેલું મોડેલ 'મ્યુઝ સ્પાર્ક' લોન્ચ થયું હતું અને ત્યારબાદ 'મ્યુઝ વન્ડર' નામનું અત્યાધુનિક મોડેલ પણ રજૂ કરવામાં આવ્યું, જેને એપ સ્ટોર પર જબરદસ્ત પ્રતિસાદ મળ્યો છે અને માત્ર બે અઠવાડિયામાં જ તેના ૨૫ લાખથી વધુ ડાઉનલોડ્સ થયા છે. મેટા આગામી સમયમાં એઆઈ ક્ષેત્રે અબજો ડોલરનું મૂડી રોકાણ કરવા જઈ રહી છે ત્યારે નાણાકીય સફળતાનું દબાણ પણ સ્પષ્ટપણે જોવા મળી રહ્યું છે. વાંગે ઝકરબર્ગના ઝડપી નિર્ણય લેવાની શૈલી અને વિઝનની પ્રશંસા કરી છે, જેણે મેટાને વૈશ્વિક સ્તરે એઆઈ ની રમતનું ચિત્ર બદલવા માટે સક્ષમ બનાવ્યું છે.
