દેશભરમાં દિવાળીના પર્વની ઉજવણી સામાન્ય રીતે ફટાકડા ફોડીને થતી હોય છે, પરંતુ અમરેલી જિલ્લાના સાવરકુંડલા શહેરમાં ઉજવાતી દિવાળીની પરંપરા સમગ્ર દેશમાં અદ્વિતીય આગવી ઓળખ ધરાવે છે. અહીં છેલ્લા ૧૫૦ વર્ષથી 'ઇંગોરીયા યુદ્ધ' રમવાની અનોખી પરંપરા આજદિન સુધી એટલા જ ઉત્સાહથી જળવાઈ રહી છે. દિવાળીની રાત્રે દેવળા ગેટથી નાવલી નદી સુધીના વિસ્તારમાં રમાતી આ રમત દરમિયાન હર્બલ ગણાતા 'ઇંગોરીયા' નામના ફટાકડા એકબીજા પર ફેંકીને યુવાનો નિર્દોષ આનંદ મેળવે છે. રાત્રિના અંધારામાં ખેલાતી આ અનોખી રમત જાણે કોઈ જીવંત રણભૂમિ હોય તેવા રોમાંચક દ્રશ્યો સર્જે છે.
આ સંત અને શૂરાઓની ભૂમિ પર રમાતી આ રમતમાં કોઈ પણ પ્રકારના જ્ઞાતિવાદ કે જાતિવાદના ભેદભાવ વગર હિન્દુ અને મુસ્લિમ સમુદાયના યુવાનો ખભે ખભો મિલાવીને ભાગ લે છે, જે કોમી એકતાનું ઉત્કૃષ્ટ ઉદાહરણ પૂરું પાડે છે. આ અદભુત નજારાને જોવા માટે સ્થાનિકો ઉપરાંત દૂર-દૂરથી હજારોની સંખ્યામાં લોકો સાવરકુંડલા ખાતે ઉપસ્થિત રહે છે. આ વર્ષે આ ગૌરવવંતી પરંપરાનો આનંદ માણવા માટે અમરેલીના સાંસદ ભરત સુતરીયા, કલેક્ટર વિકલ્પ ભારદ્વાજ અને ડાંગ જિલ્લાના એસપી પૂજા યાદવ ખાસ હાજર રહ્યા હતા. આ અવસરે નાવલી નદીના પટમાં ભવ્ય ફાયર શો અને આતિશબાજીનું પણ આયોજન કરવામાં આવ્યું હતું, જ્યાં સાંસદે તેને પ્રેમ અને ભાઈચારાનું પ્રતીક ગણાવ્યું હતું.
આગના ગોળા જેવા ઇંગોરીયા એકબીજા પર ફેંકીને રમાતી આ રોમાંચક અને સાહસિક રમત શાંતિપૂર્ણ રીતે પૂર્ણ થાય તે માટે વહીવટી તંત્ર દ્વારા પણ પૂરતી કાળજી રાખવામાં આવી હતી. દિવાળીની આખી રાત દરમિયાન પોલીસ વિભાગ, ફાયર ફાઈટર અને તબીબી ટીમો કોઈપણ આકસ્મિક સ્થિતિને પહોંચી વળવા માટે ઘટનાસ્થળે ખડેપગે તૈનાત રહી હતી. સાવરકુંડલાની આ સાંસ્કૃતિક વિરાસત સમાન પરંપરા આજની નવી પેઢીમાં પણ ભારે આકર્ષણનું કેન્દ્ર બની રહી છે અને જિલ્લાના ગૌરવમાં વધારો કરી રહી છે.
