દક્ષિણ અમેરિકાના પંતાનાલ પ્રદેશમાં વન્યજીવ સંરક્ષણને વધુ મજબૂત બનાવવાની દિશામાં બ્રાઝિલ સરકારે એક ઐતિહાસિક પગલું ભર્યું છે. માર્ચ 2026માં એન્ડીસ એમેઝોન ફંડના અહેવાલ મુજબ, માટો ગ્રોસો રાજ્યમાં આવેલા 'પંતાનાલ માટો-ગ્રોસેન્સ નેશનલ પાર્ક' અને 'તાયામા ઇકોલોજીકલ સ્ટેશન' નામના બે કેન્દ્રીય સંરક્ષણ એકમોના ક્ષેત્રફળમાં સંયુક્તપણે 2,57,531 એકરનો વિશાળ વધારો કરવામાં આવ્યો છે. આ વિસ્તૃતિકરણથી વિશ્વભરમાં જગુઆરના સૌથી મહત્વપૂર્ણ કુદરતી આવાસોમાંથી એક એવા આ પ્રદેશને વિશેષ સુરક્ષા કવચ પૂરું પાડવામાં આવ્યું છે. આ વિસ્તારમાં જગુઆર ઉપરાંત વિશાળ ઓટર, મેનેડ વુલ્ફ, જાયન્ટ એન્ટઈટર અને અનેક દુર્લભ પક્ષીઓની પ્રજાતિઓ સુરક્ષિત બનશે, જે આ ક્ષેત્રની જૈવવિવિધતાને સમૃદ્ધ રાખવામાં મદદરૂપ સાબિત થશે.
આ નવા વિસ્તૃતિકરણથી માત્ર આરક્ષિત ક્ષેત્રોનો વ્યાપ જ નથી વધ્યો, પરંતુ સમગ્ર પંતાનાલ ક્ષેત્રમાં ઇકોલોજીકલ કનેક્ટિવિટી પણ સુધરી છે. આ ભૌગોલિક જોડાણો વન્યજીવોને ઋતુચક્ર અનુસાર ખોરાક અને આશ્રયની શોધમાં એક જગ્યાએથી બીજી જગ્યાએ સરળતાથી ખસવા માટે મોકળાશ પૂરી પાડે છે. છેલ્લા કેટલાક સમયથી જંગલોમાં લાગતી આગ (વાઇલ્ડફાયર) ની સમસ્યા ખૂબ વધી ગઈ છે, જેથી આ વિસ્તૃત સુરક્ષા કવચ આગ સામે રક્ષણ મેળવવામાં અને વન્યજીવોના નિવાસસ્થાનોના નાશને રોકવામાં અત્યંત કારગર સાબિત થશે. આ પ્રોજેક્ટ સાથે જોડાયેલી આંતરરાષ્ટ્રીય સંસ્થા 'રીવાઇલ્ડ' (જેની સહ-સ્થાપના ખ્યાનામ હોલીવુડ અભિનેતા લિયોનાર્ડો ડિ કેપ્રિઓએ કરી છે) અને તેના સ્થાનિક ભાગીદારો આ સમગ્ર પ્રક્રિયામાં સક્રિયપણે કાર્યરત છે.
આ સંસ્થા માત્ર પંતાનાલ પૂરતી મર્યાદિત નથી, પરંતુ બ્રાઝિલમાં એમેઝોન ક્ષેત્રના જંગલોની સુરક્ષા માટે 'સધર્ન એમેઝોન શિલ્ડ' અને આદિવાસી સમુદાયો દ્વારા ચલાવાતા સંરક્ષણ કાર્યોને પણ આર્થિક અને તકનીકી સહયોગ પૂરો પાડે છે. તાજેતરમાં જ ડિ કેપ્રિઓ અને વરિષ્ઠ પ્રતિનિધિ રોડ્રિગો મેડેઇરોસની આગેવાની હેઠળના પ્રતિનિધિમંડળે બ્રાઝિલની મુલાકાત લઈને સરકારી અધિકારીઓ, વૈજ્ઞાનિકો અને સ્થાનિક નેતાઓ સાથે ચર્ચાઓ કરી હતી. સરકારે તાજેતરમાં કરેલા આ 2.57 લાખ એકરના વધારાથી વન્યજીવો ઉપરાંત પરંપરાગત માછીમારી અને સ્થાનિક સમુદાયોની આજીવિકાને પણ સુરક્ષા મળી છે. આ પગલું વૈશ્વિક સ્તરે પર્યાવરણ અને જંગલોના જતન માટે એક અનુકરણીય ઉદાહરણ પૂરું પાડે છે.
