અમરેલી જિલ્લામાં વંદે ભારત જેવી પ્રીમિયમ ટ્રેન સુરક્ષાને લઈને એક ગંભીર ઘટના પ્રકાશમાં આવી છે. સાબરમતીથી વેરાવળ તરફ પ્રયાણ કરી રહેલી વંદે ભારત એક્સપ્રેસ જ્યારે લાઠી અને ખીજડીયા રેલવે સ્ટેશન વચ્ચેથી પસાર થઈ રહી હતી, ત્યારે કેટલાક અજાણ્યા ઉપદ્રવી તત્વોએ તેને નિશાન બનાવી હતી. અચાનક થયેલા આ પથ્થરમારાના કારણે ચાલુ ટ્રેનના આગળના ભાગનો કાચ તૂટી ગયો હતો, જેનાથી મુસાફરોમાં થોડીવાર માટે ફફડાટ વ્યાપી ગયો હતો. જોકે, રાહતની વાત એ રહી કે આ આકસ્મિક હુમલામાં ટ્રેનમાં સવાર કોઈપણ મુસાફરને ઈજા કે જાનહાનિ પહોંચી ન હતી અને ટ્રેનને સુરક્ષિત રીતે આગળ રવાના કરવામાં આવી હતી.
ઘટનાની ગંભીરતાને ધ્યાનમાં રાખીને રેલવે તંત્ર અને સ્થાનિક પોલીસ તુરંત હરકતમાં આવી ગઈ હતી. ધોળા આરપીએફ (RPF) ગોલકર અને લાઠી પોલીસની ટીમે તાત્કાલિક ઘટનાસ્થળે પહોંચીને સઘન તપાસ શરૂ કરી છે. મુસાફરોએ પથ્થર ફેંકનારાઓને જોયા ન હોવા છતાં, રેલવે પ્રશાસન દ્વારા આસપાસના વિસ્તારમાં પેટ્રોલિંગ વધારી દેવામાં આવ્યું છે અને ગુનેગારોને ઝડપી પાડવા માટેના ચક્રોગતિમાન કરવામાં આવ્યા છે. અગાઉ પણ સુરત પાસે ઉત્તર પ્રદેશના રાજ્યપાલ આનંદીબેન પટેલની ઉપસ્થિતિવાળી ટ્રેન તેમજ ભેસ્તાન સ્ટેશન પાસે વંદે ભારત પર પથ્થરમારાની આવી જ દુર્ઘટનાઓ બની ચુકી છે, જે તંત્ર માટે ચિંતાનો વિષય છે.
દેશની હાઇ-સ્પીડ અને આધુનિક ગણાતી વંદે ભારત ટ્રેનો પર વારંવાર થઈ રહેલા પથ્થરમારાના બનાવોથી મુસાફરોની સુરક્ષા સામે મોટો પ્રશ્નાર્થ સર્જાયો છે. અસામાજિક તત્વોની આવી બેજવાબદાર હરકતોથી નિર્દોષ મુસાફરોના જાનમાલને ગંભીર જોખમ ઊભું થઈ શકે છે. આ પ્રકારની ઘટનાઓનું પુનરાવર્તન અટકાવવા માટે રેલવે લાઈનોની આસપાસ સુરક્ષા વ્યવસ્થા વધુ સઘન બનાવવામાં આવે અને આવા કસૂરવારો સામે સખતમાં સખત કાનૂની પગલાં લેવામાં આવે તેવી પ્રબળ લોકમાંગ ઉઠી છે.
