જાપાનના સમય મુજબ રવિવારે વહેલી સવારે ૧:૦૪ કલાકે મધ્ય જાપાનની ધરતી અચાનક ધ્રૂજી ઉઠતાં લોકોમાં ભારે ફફડાટ વ્યાપી ગયો હતો. શિઝુઓકા પ્રીફેક્ચરમાં જમીનથી આશરે ૪૦ કિલોમીટરની ઊંડાઈએ ઉદ્ભવેલા આ ભૂકંપની તીવ્રતા જાપાનની હવામાન એજન્સી દ્વારા ૫.૭ નોંધવામાં આવી હતી, જ્યારે યુએસ જીઓલોજિકલ સર્વે દ્વારા તેને ૫.૫ આંકવામાં આવ્યો હતો. આ ભૂકંપનું કેન્દ્રબિંદુ ટોક્યોથી દૂર હોવાથી રાજધાનીમાં તેની કોઈ ખાસ અસર અનુભવાઈ ન હતી, પરંતુ આઈચી અને શિઝુઓકા જેવા પડોશી પ્રદેશોમાં ધરતીના ભારે આંચકા અનુભવાયા હતા જેની અસર ક્યોટો, નારા અને માઉન્ટ ફુજી જેવા ઐતિહાસિક અને પ્રવાસી વિસ્તારો સુધી જોવા મળી હતી.
ભૂકંપની તીવ્રતા એટલી પ્રચંડ હતી કે તેના આંચકાને કારણે અનેક વ્યાપારી સંકુલોમાં દુકાનોના કાચ તૂટીને રસ્તાઓ પર વેરાઈ ગયા હતા, જ્યારે પુસ્તકોની દુકાનોમાં છાજલીઓ પરથી હજારો પુસ્તકો નીચે પટકાયા હતા. આ અચાનક આવેલી આફતથી ગભરાઈને લોકો તાત્કાલિક પોતાની ઇમારતો અને ઘરોમાંથી બહાર સુરક્ષિત સ્થળો તરફ ભાગ્યા હતા. આ ભાગદોડ અને અફરાતફરીના માહોલ વચ્ચે સીડીઓ પરથી પડી જવાથી અથવા કાચના ટુકડા વાગવાથી ઓછામાં ઓછા ૨૨ લોકો ઘાયલ થયા હોવાના અહેવાલ છે, જેમને સ્થાનિક તંત્ર દ્વારા તાત્કાલિક સહાય પૂરી પાડવામાં આવી રહી છે.
સંભવિત જોખમો અને નુકસાનને ધ્યાનમાં રાખીને તંત્ર દ્વારા ત્વરિત પગલાં લેવામાં આવ્યા હતા, જેના ભાગરૂપે પ્રભાવિત વિસ્તારોમાં 'શિિંકનસેન' (બુલેટ ટ્રેન) ને સાવચેતીના ભાગરૂપે ઓછી ઝડપે ચલાવવામાં આવી હતી જેથી રેલવે ટ્રેકને થયેલા નુકસાનથી કોઈ મોટી દુર્ઘટના ટાળી શકાય. ભૂકંપની આ ઘટના બાદ કેટલાક નાના આફ્ટરશોક્સ (પછીના આંચકા) પણ અનુભવાયા હતા. ઉલ્લેખનીય છે કે જાપાન ભૌગોલિક દ્રષ્ટિએ અત્યંત સંવેદનશીલ અને ભૂકંપગ્રસ્ત ક્ષેત્રમાં આવેલું હોવાથી અહીં આપત્તિ વ્યવસ્થાપન તંત્ર હંમેશાં હાઈ એલર્ટ પર રહે છે.
