નવી દિલ્હીમાં પંચાયતી રાજ મંત્રાલય દ્વારા આયોજિત એક રાષ્ટ્રીય સ્તરના વર્કશોપમાં કેન્દ્રીય મંત્રી રાજીવ રંજનસિંહ ઉર્ફે લલનસિંહે એક મોટું નિવેદન આપતા જણાવ્યું હતું કે, સરકારી યોજનાઓ અને સહાયના લાભો હવે આધાર કાર્ડના સ્થાને ચૂંટણી કાર્ડ (એપિક) નંબરના આધારે બેંક ખાતામાં જમા કરવામાં આવશે. મંત્રીએ આ બાબતે સ્પષ્ટતા કરતા કહ્યું હતું કે હાલમાં દેશના દરેક ખૂણે અને ગલીએ આધાર કેન્દ્રો ખૂલી ગયા છે અને ગણતરીની મિનિટોમાં નકલી કે ગેરકાયદેસર આધાર કાર્ડ પણ બની જાય છે, જેના કારણે સરકારી સહાયની વિતરણ વ્યવસ્થામાં ચોકસાઈ લાવવા માટે આ નવો નિર્ણય લેવામાં આવ્યો છે. તેમણે મોદી સરકારની પારદર્શિતાની પ્રશંસા કરતા દગાખોરી અટકાવવા આ પગલું જરૂરી હોવાનું સૂચવ્યું હતું.
મંત્રી લલનસિંહનું આ નિવેદન સામે આવતા જ રાજકીય ગલિયારોમાં ભારે હલચલ મચી ગઈ હતી અને વિપક્ષી નેતાઓએ સરકારને ઘેરવાનું શરૂ કર્યું હતું. કોંગ્રેસ નેતા રાહુલ ગાંધીએ સોશિયલ મીડિયા પર આ નિવેદનનો વીડિયો શેર કરીને સવાલ ઉઠાવ્યો હતો કે સરકારે મોટા પ્રમાણમાં મતદારોના નામ રદ કરી નાખ્યા છે, તો જો વોટર કાર્ડના આધારે જ રાશન, પેન્શન કે મનરેગા જેવી યોજનાઓનો લાભ મળશે તો નામો કમી થયેલા નાગરિકો આ યોજનાઓથી વંચિત રહી જશે. આ ઉપરાંત, સમાજવાદી પાર્ટીના વડા અખિલેશ યાદવે પણ કટાક્ષ કરતા પૂછ્યું હતું કે નાના બાળકો પણ સરકારી યોજનાના લાભાર્થી હોય છે જેમની પાસે ચૂંટણી કાર્ડ હોતું નથી, તો શું તેમને મિડ-ડે મીલ કે અન્ય બાળ કલ્યાણના લાભો નહીં મળે?
આ ચોતરફી વિવાદ અને ભારે આલોચના બાદ આખરે કેન્દ્રીય મંત્રી લલનસિંહે એક વીડિયો સંદેશ જારી કરીને સમગ્ર મામલે ખુલાસો કરવો પડ્યો હતો. તેમણે સ્પષ્ટતા કરી હતી કે સરકાર દ્વારા આધાર કાર્ડને સંપૂર્ણપણે નાબૂદ કરવામાં નથી આવી રહ્યું, પરંતુ સરકારી યોજનાઓમાં વધુ પારદર્શિતા લાવવા અને ચોકસાઈ જાળવવા માટે હવે બાયોમેટ્રિક પદ્ધતિની સાથે વોટર આઇડી કાર્ડને પણ જોડવાની કવાયત હાથ ધરવામાં આવી રહી છે. રાજીવ ગાંધીના સમયના ભ્રષ્ટાચારને યાદ કરતા તેમણે દાવો કર્યો હતો કે મોદી સરકારના શાસનમાં દલાલોની મિલીભગત નાબૂદ થઈ છે અને સરકારી સહાયના પૂરેપૂરા ૧૦૦ રૂપિયા સીધા જ સાચા લાભાર્થીના ખાતામાં જમા થઈ રહ્યા છે.
