દેશમાં હાલ 'વોટ ચોરી' અને ચૂંટણી પંચની પારદર્શિતાને લઈને ગરમાગરમ રાજકીય માહોલ સર્જાયો છે, ત્યારે પ્રદેશ ભાજપ પ્રવક્તા અને મીડિયા ઈનચાર્જ પ્રશાંત વાળાએ એક મુલાકાતમાં વિપક્ષી પાર્ટીઓ પર આકરા પ્રહારો કર્યા છે. તેમણે સ્પષ્ટતા કરી કે સ્પેશિયલ ઇન્ટેન્સિવ રિવિઝન (SIR) એ કોઈ નવી કે અચાનક લાવવામાં આવેલી પ્રક્રિયા નથી, પરંતુ વર્ષ 1952થી અત્યાર સુધીમાં 12મી વખત યોજાતી મતદાર યાદી શુદ્ધ કરવાની નિયમિત પ્રક્રિયા છે. આમાંથી 10 વખત કોંગ્રેસ સરકારના સમયમાં જ આ કામગીરી થઈ ચૂકી છે. દેશના 13 કરોડ મતદારોના નામ હટાવવા અંગે તેમણે જણાવ્યું હતું કે આ યાદીમાં અંદાજે 3 કરોડ મૃતકો, 3 કરોડ સ્થળાંતરિત થયેલા, 1 કરોડ ડુપ્લિકેટ અને બાકીના 3 કરોડ ગેરકાયદેસર ઘૂસણખોરો કે વિદેશી નાગરિકો છે, જેઓ કોંગ્રેસની મુખ્ય વોટબેંક છે. આ ગેરકાયદેસર તત્વો પકડાઈ ન જાય તે માટે વિપક્ષ દ્વારા જનતાને ગેરમાર્ગે દોરવા 'વોટ ચોરી'નું ખોટું નરેટિવ ઊભું કરવામાં આવી રહ્યું છે.
આ મુલાકાતમાં કોંગ્રેસના ભૂતકાળ અને વર્તમાન વલણ પર કટાક્ષ કરતા પ્રશાંત વાળાએ સવાલ ઉઠાવ્યો હતો કે, "સોનિયા ગાંધીને 1980માં પહેલા વોટર કાર્ડ મળ્યું અને 1983માં ભારતની નાગરિકતા મળી, શું આ અસલી વોટ ચોરી નથી?" તેમણે ઈન્દિરા ગાંધીના કાળની કટોકટી અને ભૂતકાળના કોંગ્રેસી શાસન દરમિયાન ચૂંટણી પંચના અધિકારીઓની રાજકીય નિયુક્તિઓનો પણ દાખલો આપ્યો હતો. વાળાએ આક્ષેપ કર્યો હતો કે આજે વિપક્ષી નેતાઓ અને 100થી વધુ સાંસદો રસ્તા પર ઉતરીને બાંગ્લાદેશ, ફ્રાન્સ કે નેપાળની જેમ ભારતમાં પણ 'રિજિમ ચેન્જ' અને અરાજકતા ફેલાવવા માંગે છે. સંસદમાં ચર્ચા કરવાના બદલે માત્ર રાજકીય રોટલા શેકવા માટે વિદેશી ભંડોળથી ચાલતી ટૂલકિટનો ઉપયોગ કરીને દેશની જનતાને ઉશ્કેરવામાં આવી રહી છે, જેને દેશની સુજાન જનતા સારી રીતે ઓળખી ગઈ છે.
છેલ્લે, લોકશાહી અને ચૂંટણી પંચની વિશ્વસનીયતા વિશે વાત કરતા ભાજપના પ્રવક્તાએ જણાવ્યું હતું કે વર્તમાન ચૂંટણી પ્રક્રિયા અત્યંત પારદર્શક છે અને તેમાં તમામ રાજકીય પક્ષોના બૂથ લેવલ એજન્ટોની સહમતિ લેવામાં આવે છે. નામ કમી થવાની સ્થિતિમાં પણ યોગ્ય દસ્તાવેજો રજૂ કરીને નામ ફરીથી ઉમેરવાની કાયમી વ્યવસ્થા ઉપલબ્ધ છે. દેશના નિવૃત્ત ન્યાયાધીશો અને વરિષ્ઠ અધિકારીઓએ પણ આ પ્રક્રિયાને બિરદાવી છે. ભાજપ દ્વારા 'લોકશાહી બચાવો, અરાજકતા હટાવો' પદયાત્રા યોજવા પાછળનો મુખ્ય ઉદ્દેશ્ય જનતાને સત્યથી અવગત કરવાનો છે. તેમણે ભારપૂર્વક જણાવ્યું કે લોકતંત્રમાં સત્તા રસ્તાઓ પર નહીં પરંતુ દર પાંચ વર્ષે યોજાતી જનતાની અદાલતમાં જ નક્કી થાય છે, અને ભારતની જનતા ક્યારેય દેશમાં અશાંતિ ફેલાવનારાઓને સફળ થવા નહીં દે.
