આંતરરાષ્ટ્રીય ક્રિકેટ પરિષદ (આઈસીસી) દ્વારા વૈશ્વિક સ્તરે આવક વધારવા અને ક્રિકેટને નવો વેગ આપવાના ઉદ્દેશ્યથી નવી ટુર્નામેન્ટ્સ શરૂ કરવાની મહત્ત્વાકાંક્ષી યોજનાને મોટો આંચકો લાગ્યો છે. ભારતીય ક્રિકેટ કંટ્રોલ બોર્ડ (બીસીસીઆઈ), ક્રિકેટ ઓસ્ટ્રેલિયા અને ઈંગ્લેન્ડ ક્રિકેટ બોર્ડના સંયુક્ત તેમજ પ્રખર વિરોધના પગલે આઈસીસીએ વર્ષ ૨૦૩૧ સુધી કોઈપણ નવી ટુર્નામેન્ટ શરૂ ન કરવાનો અંતિમ નિર્ણય લીધો છે. દુબઈ ખાતે યોજાયેલી આઈસીસી ક્રિકેટ ઓપરેશન્સ વર્કશોપમાં મહિનાઓ સુધી ચાલેલા સઘન વિચારવિમર્શ બાદ આખરે કોઈપણ નવા પ્રસ્તાવ વિના બેઠક પૂર્ણ જાહેર કરવામાં આવી હતી.
અહેવાલો અનુસાર, એક અગ્રણી વૈશ્વિક સલાહકાર કંપનીના વ્યૂહાત્મક અહેવાલને આધારે આઈસીસીએ આવક વધારવા માટે ટી-૨૦ ફ્રેન્ચાઈઝી ટીમો વચ્ચે 'વર્લ્ડ ક્લબ ચેમ્પિયનશિપ' અને કેલેન્ડરમાં મળતી ખાલી વિન્ડો દરમિયાન ચાર દેશોની મિની ટી-૨૦ ટુર્નામેન્ટ યોજવા જેવા પ્રસ્તાવો રજૂ કર્યા હતા. જોકે, ભારત, ઓસ્ટ્રેલિયા અને ઈંગ્લેન્ડે સ્પષ્ટ શબ્દોમાં જણાવી દીધું હતું કે ખેલાડીઓના અતિ વ્યસ્ત શેડ્યૂલમાં આવી કોઈ નવી સ્પર્ધા માટે જગ્યા નથી. તેમણે એવી પણ દલીલ કરી હતી કે નવી ટુર્નામેન્ટ ઉમેરવા માટે હાલના વનડે વર્લ્ડ કપ, ટી-૨૦ વર્લ્ડ કપ કે ચેમ્પિયન્સ ટ્રોફી જેવી મોટી સ્પર્ધાઓના કદમાં કાપ મૂકવો પડે, જે વ્યવહારુ રીતે શક્ય નથી.
આ મડાગાંઠ વચ્ચે, આગામી ફ્યુચર ટુર્સ પ્રોગ્રામમાં એકમાત્ર મોટો સંભવિત ફેરફાર વર્લ્ડ ટેસ્ટ ચેમ્પિયનશિપના વિસ્તરણનો હોઈ શકે છે. ટેસ્ટ ચેમ્પિયનશિપમાં ટીમોની સંખ્યા નવથી વધારીને ૧૨ કરવામાં આવે તેવી શક્યતા છે, જેમાં અફઘાનિસ્તાન, આયર્લેન્ડ અને ઝિમ્બાબ્વેને પણ સામેલ કરવામાં આવી શકે છે. આઈસીસીની નવી દરખાસ્તોને ફગાવી દીધા બાદ ત્રણેય અગ્રણી બોર્ડે વર્ષ ૨૦૩૧ સુધીના પોતાના દ્વિપક્ષીય પ્રવાસોનું સમયપત્રક નિશ્ચિત કરી લીધું છે. જેમાં પ્રતિષ્ઠિત એશિઝ શ્રેણી ઉપરાંત, વર્ષ ૨૦૨૮ની શરૂઆતમાં ભારત-ઈંગ્લેન્ડ વચ્ચે પાંચ ટેસ્ટ મેચની શ્રેણી અને ૨૦૨૯માં ભારતીય ટીમનો ઈંગ્લેન્ડ પ્રવાસ પણ સામેલ છે.
