અમદાવાદ શહેરમાં હાલ ડેન્ગ્યુના એક ખતરનાક સ્વરૂપે માથું ઊંચક્યું છે, જેના કારણે સામાન્ય જનતાની સાથેસાથે આરોગ્ય વિભાગની પણ ઊંઘ હરામ થઈ ગઈ છે. શહેરમાં ડેન્ગ્યુ ટાઇપ-2 વાયરસનો ભયાવહ કહેર જોવા મળી રહ્યો છે. તાજેતરમાં દર્દીઓની સ્થિતિ ચકાસવા માટે ગાંધીનગરની લેબોરેટરીમાં કેટલાક સેમ્પલ મોકલવામાં આવ્યા હતા, જેના રિપોર્ટે સૌને ચોંકાવી દીધા છે. કુલ 53 સેમ્પલનું ટેસ્ટિંગ કરવામાં આવ્યું, જેમાંથી 46 એટલે કે આશ્ચર્યજનક રીતે 86 ટકા દર્દીઓમાં આ જીવલેણ વાયરસ હોવાની પુષ્ટિ થઈ છે. આ ઊંચો દર શહેરમાં રોગચાળાની ગંભીર સ્થિતિ તરફ સીધો ઇશારો કરે છે.
આ કેસમાં સૌથી ડરામણી વાત એ છે કે આ વાયરસ માત્ર માણસોમાં જ નહીં, પરંતુ મચ્છરોમાં પણ બેફામ રીતે ફેલાયેલો છે. શહેરમાંથી એકત્ર કરવામાં આવેલા મચ્છરોના 29 સેમ્પલની તપાસ કરવામાં આવી, જેમાંથી 25 સેમ્પલમાં આ ખતરનાક વાયરસ પોઝિટિવ આવ્યો છે. મેડિકલ એક્સપર્ટ્સના મતે, ડેન્ગ્યુ ટાઇપ-2 વાયરસ સામાન્ય ડેન્ગ્યુ કરતાં ઘણો વધારે ઘાતક અને જીવલેણ સાબિત થાય છે. આ વાયરસથી સંક્રમિત દર્દીઓમાં ગૂંચવણો વધવાની અને સમયસર સારવાર ન મળે તો જીવનું જોખમ પણ અનેકગણું વધી જતું હોય છે. આ પરિસ્થિતિ જોતાં ડોક્ટરો પણ દર્દીઓને તાત્કાલિક હોસ્પિટલ પહોંચીને સઘન સારવાર લેવાની સલાહ આપી રહ્યા છે.
શહેરમાં આ રોગચાળો વકરવા પાછળ ભેજવાળું વાતાવરણ અને ઠેર-ઠેર ભરાયેલું પાણી મુખ્ય કારણ છે. ખાસ કરીને કન્સ્ટ્રક્શન સાઇટ્સ પર યોગ્ય કાળજીના અભાવે મચ્છરોના પ્રજનન માટે અનુકૂળ માહોલ બની જાય છે. નવાઈની વાત એ છે કે ચોમાસું ગયાને કે વરસાદ બંધ થયાને પણ 1 મહિના જેટલો સમય વીતી ગયો છે, છતાં ડેન્ગ્યુના કેસો ઘટવાનું નામ નથી લઈ રહ્યા. બીજી તરફ, સ્થાનિક તંત્ર દ્વારા ફોગિંગ અને પાણીના નિકાલની કામગીરીમાં જે પ્રકારની ઉદાસીનતા દાખવવામાં આવી રહી છે તેને લઈને પણ નાગરિકોમાં રોષ જોવા મળી રહ્યો છે. જો સમયસર કડક પગલાં નહીં ભરાય, તો આગામી દિવસોમાં સ્થિતિ વધુ બેકાબૂ બની શકે છે.
આ કપરા સમયમાં માત્ર તંત્ર પર ભરોસો બેસી રહેવાને બદલે નાગરિકોએ પણ પોતાની જાતે જ સાવચેતી રાખવી અનિવાર્ય છે. તમારા ઘરની આસપાસ કે અગાસી પર ક્યાંય પાણી જમા ન થવા દો અને મચ્છરોથી બચવા માટે મોઈસ્ક્વિટો રિપેલન્ટ કે પૂરા બાંયાના કપડાં પહેરવા જેવા સામાન્ય ઉપાયો અચૂક અપનાવો. તંત્રએ પણ આ બાબતે યુદ્ધના ધોરણે મેદાનમાં ઉતરીને સ્પેશિયલ ડ્રાઇવ ચલાવવી પડશે, જેથી અમદાવાદના નાગરિકોના સ્વાસ્થ્ય અને જીવનું રક્ષણ થઈ શકે.
