ચેન્નાઈ સ્થિત ડ્રીમ મેકર્સ ગ્લોબલ પ્રાઇવેટ લિમિટેડ (DMGPL) નામની કંપનીએ સોફ્ટવેર પ્રોજેક્ટ્સમાં રોકાણના નામે હજારો સામાન્ય નાગરિકો સાથે મોટો છેતરપિંડીનો ખેલ રચ્યો હતો. કંપનીએ રોકાણકારોને ઊંચા દૈનિક વળતરની લાલચ આપી હતી અને માત્ર 150 દિવસમાં જ નાણાં ડબલ કરી આપવાના મોટા વાયદા કર્યા હતા. શરૂઆતના તબક્કામાં લોકોનો વિશ્વાસ જીતવા માટે કેટલાક રોકાણકારોને વળતર ચૂકવવામાં પણ આવ્યું હતું, પરંતુ સમય જતાં કંપનીએ નાણાં પરત કરવાનું બંધ કરી દીધું હતું અને ડિપોઝિટર્સને ભારે નુકસાન સહન કરવાનો વારો આવ્યો હતો. આ સમગ્ર કૌભાંડ પ્રકાશમાં આવ્યા બાદ કોઈમ્બતુરની ઈકોનોમિક ઓફેન્સ વિંગ (EOW) દ્વારા નોંધવામાં આવેલી એફઆઈઆરના આધારે EDએ આ મામલે મની લોન્ડ્રિંગ વિરોધી કાયદા હેઠળ સઘન તપાસ શરૂ કરી હતી.
EDની અત્યાર સુધીની સઘન તપાસમાં બહાર આવ્યું છે કે આ છેતરપિંડીનો વ્યાપ અંદાજે રૂ. 400 કરોડ જેટલો મોટો છે, જે રોકાણકારો પાસેથી એકત્ર કરીને DMGPLના મુખ્ય ત્રણ બેંક ખાતાઓમાં જમા કરવામાં આવ્યો હતો. આ જંગી રકમની હેરાફેરી કરવા માટે કંપનીએ એક સુઆયોજિત કાવતરું ઘડીને તેને અનેક બેંક ખાતાઓમાં ફેરવી હતી. રોકાણકારોના આ નાણાંને કંપનીના મુખ્ય પદાધિકારીઓ, એજન્ટો, ફ્રેન્ચાઈઝીઓ અને સંબંધિત બિઝનેસ યુનિટ્સના નામે એકાઉન્ટ્સે-એકાઉન્ટ ટ્રાન્સફર, રોકડ ઉપાડ અને સહયોગીઓને ચુકવણીના માધ્યમથી ડાયવર્ટ કરવામાં આવ્યા હતા. તપાસ એજન્સીને એ પણ જાણવા મળ્યું છે કે રોકાણકારોના આ નાણાંનો મોટા પાયે દુરુપયોગ કરીને જમીન-મકાન જેવી સ્થાવર મિલકતો, મોંઘા વાહનો અને સોનાના દાગીના ખરીદવામાં આવ્યા હતા, તેમજ એજન્ટોને ભારે કમિશન પણ ચૂકવાયું હતું.
આ ગંભીર આર્થિક અનિયમિતતાઓને ડામવા માટે ED દ્વારા અગાઉ ગત 30 જૂન, 2026ના રોજ DMGPL અને તેના સાથે સંકળાયેલા તમામ મુખ્ય વ્યક્તિઓ અને વ્યવસાયિક સંકુલો પર દરોડા તથા સર્વેની કાર્યવાહી હાથ ધરવામાં આવી હતી. આ દરોડા દરમિયાન તપાસકર્તાઓને કૌભાંડ સાથે જોડાયેલા અનેક મહત્વપૂર્ણ દસ્તાવેજો, ઇલેક્ટ્રોનિક ઉપકરણો અને અન્ય પુરાવાઓ મળી આવ્યા હતા, જેને એજન્સીએ જપ્ત કરી લીધા છે. હાલ ED આ મામેળ વધુ તપાસ ચલાવી રહી છે જેથી રોકાણકારોના ડૂબેલા નાણાં અને આ કૌભાંડના અન્ય મુખ્ય સૂત્રધારા સુધી પહોંચી શકાય. નાણાકીય છેતરપિંડી આચરનારા તત્વોમાં આ કાર્યવાહીથી ભારે હડકંપ મચી ગયો છે.
