નર્મદા જિલ્લાના વૈશ્વિક પ્રવાસન સ્થળ એવા એકતાનગરમાં પ્રવાસીઓ માટે વધુ એક નવું અને આકર્ષક નજરાણું ઉમેરાયું છે. અહીં આવેલા જાણીતા ગોરા બ્રિજની આસપાસના નયનરમ્ય વાતાવરણમાં નાના-મોટા પથ્થરોનો ઉપયોગ કરીને એક વિશાળ કૃત્રિમ મગરની પ્રતિકૃતિ તૈયાર કરવામાં આવી છે. નર્મદા નદીના વિશાળ પટને અડીને ઊભેલી આ રચના પ્રથમ નજરે જ ત્યાંથી પસાર થતા દરેક પ્રવાસીનું ધ્યાન પોતાના તરફ ખેંચી રહી છે. પ્રકૃતિની ગોદમાં માનવસર્જિત કલ્પનાશક્તિનું આ ઉત્કૃષ્ટ ઉદાહરણ ગોરા બ્રિજના સમગ્ર દૃશ્યને એક નવી અને આગવી ઓળખ પ્રદાન કરી રહ્યું છે.
આ શિલ્પકળાની વિશેષતા એ છે કે તેમાં મગરના શરીરની વિશાળ કાયા, તેનું ખુલ્લું ભયાનક જડબું અને અન્ય શારીરિક બારીક વિગતોને ખૂબ જ ઝીણવટપૂર્વક આકાર આપવામાં આવ્યો છે. વાસ્તવિક મગર જેવો જ ભાસ કરાવતી આ કલાકૃતિ પ્રવાસીઓમાં ભારે કુતૂહલ જગાવે છે અને તેમને વાહન થંભાવીને આ શિલ્પને નજીકથી નિહાળવા માટે મજબૂર કરે છે. આ માનવસર્જિત રચના માત્ર એક કલાત્મક શિલ્પ પૂરતી મર્યાદિત નથી, પરંતુ તે એકતાનગરની મુલાકાતે આવતા સહેલાણીઓ માટે યાદગાર અનુભવ પૂરો પાડે છે.
ભારતીય સંસ્કૃતિ અને ધર્મમાં નર્મદા માતાના વાહન તરીકે મગરનું વિશેષ મહત્ત્વ રહેલું છે, જે આ પ્રતિકૃતિના માધ્યમથી સાર્થક થાય છે. ધાર્મિક આસ્થા, પ્રતીકાત્મકતા અને અદભુત શિલ્પકળાનું આ અનોખું સંયોજન પરિવાર સાથે ફરવા આવતા પ્રવાસીઓમાં ખાસ કરીને બાળકોમાં ભારે ઉત્સુકતા જગાવી રહ્યું છે. સોશિયલ મીડિયાના આ યુગમાં પ્રવાસીઓ માટે આ મગરની પ્રતિકૃતિ સેલ્ફી અને ફોટોગ્રાફીનું એક ઉત્તમ હબ બની રહી છે, જે આગામી દિવસોમાં પ્રવાસન પ્રવૃત્તિઓને વધુ વેગ આપશે.
