ભારતના વડાપ્રધાન નરેન્દ્ર મોદીના ૨૫ વર્ષના જનસેવા યાત્રા સેવા સંકલ્પ અભિયાન અંતર્ગત ભરૂચ જિલ્લા રોજગાર કચેરી દ્વારા નેત્રંગની આઈ.ટી.આઈ. (મહિલા) ખાતે એક ભવ્ય ઔદ્યોગિક રોજગાર ભરતી મેળાનું સફળ આયોજન કરવામાં આવ્યું હતું. આ કાર્યક્રમનો મુખ્ય ઉદ્દેશ્ય સ્થાનિક યુવાઓને રોજગારી પૂરી પાડવા સાથે તેમને પ્રોત્સાહિત કરવાનો હતો, જેના ભાગરૂપે અધિકારીઓ દ્વારા યુવાનો સાથે પ્રત્યક્ષ સંવાદ પણ સાધવામાં આવ્યો હતો. આ ભરતી મેળામાં જુદી-જુદી શૈક્ષણિક લાયકાત ધરાવતા અસંખ્ય ઉમેદવારોએ ઉત્સાહભેર ભાગ લીધો હતો અને પોતાની કારકિર્દી ઘડતર માટે યોગ્ય તકોની શોધ કરી હતી.
રોજગાર મેળામાં વિવિધ ક્ષેત્રની પ્રતિષ્ઠિત ૮ જેટલી કંપનીઓએ ભાગ લીધો હતો અને સીધી ભરતી પ્રક્રિયા અંતર્ગત ઉમેદવારોના ઇન્ટરવ્યુ લીધા હતા. માત્ર નોકરી જ નહીં, પરંતુ યુવાનો સ્વરોજગાર તરફ વળે તેવા ઉમદા હેતુથી સરકારી લોન અને સહાય યોજનાઓ, સ્ટાર્ટઅપ તેમજ સ્ટેન્ડઅપ યોજનાઓ વિશે પણ વિસ્તૃત માર્ગદર્શન પૂરું પાડવામાં આવ્યું હતું. આ ઉપરાંત, આજના સ્પર્ધાત્મક યુગમાં યુવાનો વ્યવસાયલક્ષી તાલીમ મેળવીને ઉદ્યોગસાહસિક બને અને ઓનલાઈન ક્ષેત્રે ઉપલબ્ધ રોજગારીની નવી તકોથી અવગત થાય તે માટે વિશેષ કારકિર્દી માર્ગદર્શન સત્રનું પણ આયોજન કરવામાં આવ્યું હતું.
આ સમગ્ર રોજગાર ભરતી મેળામાં કુલ ૧૦૫ યુવા ઉમેદવારોએ ઇન્ટરવ્યુ આપ્યા હતા, જેમાંથી ઉત્સાહી અને લાયક ૪૭ યુવક-યુવતીઓની રોજગારી માટે પ્રાથમિક પસંદગી કરવામાં આવતા તેમનામાં ખુશીની લહેર દોડી ગઈ હતી. આ સફળ કાર્યક્રમમાં જિલ્લા રોજગાર કચેરીના સક્ષમ અધિકારી સંજયભાઈ ગોહિલ, આઈ.ટી.આઈ.ના આચાર્ય તેમજ અનેક ગણમાન્ય મહાનુભાવો અને મોટી સંખ્યામાં નોકરીવાંચ્છુક ઉમેદવારો ઉપસ્થિત રહી આ સમગ્ર આયોજનને સફળ બનાવવામાં સહભાગી બન્યા હતા.
