અંકલેશ્વરના દીવા રોડ પર ઓરેન્જ સિટી પાસે ચાલી રહેલી નાળાની વિવાદિત કામગીરીને પગલે સ્થાનિક નાગરિકો છેલ્લા ઘણા સમયથી મુશ્કેલીમાં મુકાયા હતા. વિકાસ કાર્ય માટે બનાવવામાં આવેલા હંગામી કાચા રસ્તા પરથી સતત વાહનોની અવરજવર રહેતી હોવાના કારણે ભારે ધૂળની ડમરીઓ ઊડતી હતી. આ અસહ્ય ધૂળ અને પ્રદૂષણને કારણે ત્યાંથી પસાર થતા વાહનચાલકો, રાહદારીઓ તેમજ આસપાસના રહેવાસીઓને સ્વાસ્થ્ય સંબંધી અને દૈનિક કામકાજમાં ભારે હાલાકીનો સામનો કરવો પડતો હતો.
આ ગંભીર સમસ્યા અંગે સ્થાનિક સ્તરે વારંવાર રજૂઆતો કરવામાં આવી હતી અને અખબારોમાં અહેવાલો પણ પ્રકાશિત થયા હતા. અહેવાલો અને જનઆક્રોશની વ્યાપક અસરને ધ્યાનમાં રાખીને આખરે તંત્ર અને સંબંધિત કોન્ટ્રાક્ટર દ્વારા સક્રિયતા દાખવવામાં આવી છે. આજના દિવસે ઓરેન્જ સિટી પાસેના આ હંગામી રસ્તા પર ટેમ્પરરી ધોરણે ડામર પાથરવાની કામગીરીનો આરંભ કરવામાં આવ્યો છે, જે સરાહનીય પગલું સાબિત થઈ રહ્યું છે.
જોકે, આ રાહત હજુ સુધી સમગ્ર વિસ્તારમાં પૂરેપૂરી પહોંચી નથી, કારણ કે દીવા રોડ પર જ જલારામ મંદિર પાસે પણ અન્ય એક નાળાનું નિર્માણ કાર્ય ચાલી રહ્યું છે. ત્યાં પણ હંગામી રસ્તાની ખરાબ હાલત અને ઊડતી ધૂળને કારણે નાગરિકો અત્યારે પણ મુશ્કેલી અનુભવી રહ્યા છે. આ પરિસ્થિતિને જોતાં સ્થાનિક લોકો દ્વારા એવી પ્રબળ લોકમાગ ઉઠાવવામાં આવી છે કે, જે રીતે ઓરેન્જ સિટી પાસે ડામર પાથરવામાં આવ્યો છે, તે જ રીતે જલારામ મંદિર પાસેના હંગામી રસ્તા પર પણ વહેલી તકે ડામર પથરાય.
